Министерка на Трамп поднесе оставка: Имала сексуална афера со член на обезбедувањето и пиела на работа?

Министерката за труд на САД, Лори Чавез-ДеРемер, поднесе оставка, објави администрацијата на претседателот Доналд Трамп во понеделник, јавува „Гардијан“.

„Министерката ја напушта администрацијата за да заземе позиција во приватниот сектор. Таа заврши извонредна работа – заштитувајќи ги американските работници, спроведувајќи фер работни практики и помагајќи им на Американците да стекнат дополнителни вештини за да го подобрат квалитетот на нивниот живот“, изјави портпаролот на Трамп, Стивен Чеунг, на социјалните медиуми.

Чавез-ДеРемер, пак, рече дека е чест и привилегија да служи во „историска администрација и да работи за најголемиот претседател во нејзиниот живот“.

Серија контроверзии

Пред да замине, Чавез-ДеРемер се најде во центарот на политички и лични контроверзии. „Њујорк тајмс“ (NYT) објави во март дека е осомничена за афера со член на нејзиниот тим за обезбедување, чувала алкохол во канцеларијата и користела владини ресурси за приватни патувања. Нејзините блиски соработници, кои наводно се обиделе да насочат средства за поддршка кон политички поврзани лица, исто така се под истрага.

Инспекторите, исто така, ги пребаруваат материјалите што покажуваат дека неодамна назначената министерка, нејзините соработници и членовите на семејството редовно испраќале лични пораки и барања до помладите вработени. NYT објави дека нејзиниот сопруг, Шон Деремер, и неговиот татко разменувале текстуални пораки со млади вработени.

Скандалите не завршуваат тука. На нејзиниот сопруг му беше забрането да влезе во седиштето на Министерството за труд откако две вработени го обвинија за сексуален напад – тие рекоа дека несоодветно ги допирал во зградата.

Чавез-Деремер е третата членка на кабинетот што ја напушти својата позиција за време на вториот мандат на Трамп. Пред неа, претседателот ги отпушти секретарката за внатрешна безбедност Кристи Ноем и државната обвинителка Пам Бонди.