Густ облак од прашина што денес го покри поголемиот дел од западен Иран ги принуди властите да наредат затворање на локалните училишта и да апелираат до околу 13 милиони жители да останат дома.
Провинциите Лорестан, Илам, Керманшах, Курдистан (на запад), Занџан (северозапад), Бушер (југ) и Хузестан (југозапад) се погодени од овие мерки, објави иранската државна телевизија.
На населението му се препорачува да не излегува надвор и да носи маска за сите неопходни патувања, додаде телевизијата, нагласувајќи дека локалната видливост не надминува еден километар, пренесува Бета.
Метеоролошката служба ги припиша временските услови на „движење на голема маса прашина од Ирак кон западен Иран“.
Овој феномен, кој е сè почест во Иран, се влошува поради сушата.
