Еден маж е уапсен откако наводно испрскал со бибер-спреј гледач во кино кој за време на проекцијата користел мобилен телефон.
Полицијата во Бурбанк, во американската сојузна држава Калифорнија, добила повик во вторникот околу 17.30 часот поради инцидент во киното „AMC Burbank 16“.
Еден од сведоците им кажал на полицајците дека, околу 40 минути по почетокот на филмот, неколку реда зад себе слушнал звук од спреј. Набргу потоа, еден гледач почнал да вика дека е испрскан со бибер-спреј, додека осомничениот ја напуштил салата.
Иритација предизвикана од бибер-спрејот почувствувале уште двајца гледачи, на кои им била укажана помош во локалната болница, соопшти полицијата.
Како осомничен е идентификуван Метју Вер (34) од Лос Анџелес, а полицајците го привеле во фоајето на киното.
Сведокот Џо Родригез изјави за „CBS Los Angeles“ дека инцидентот се случил за време на проекцијата на филмот The Uprising, во кој глумат Ендрју Гарфилд и Томасин Мекензи.
— Ова е дефинитивно најбизарната работа што сум ја видел во кино — рече Родригез.
Според неговите зборови, еден маж користел телефон чиј екран бил поставен на слаба осветленост, кога Вер му пришол и побарал да го исклучи. Откако мажот одбил, Вер наводно се изнервирал и го испрскал со бибер-спреј.
— Ова е лудо, еден возрасен човек да посегне по такво нешто. Мора да се признае дека прво се обиде со разговор, но ваквото однесување е едноставно неприфатливо — изјави Родригез.
Откако Вер ја напуштил салата, надвор истрчале нападнатиот маж и уште двајца сведоци за да побараат помош од вработените.
Управата на киното им понудила на гледачите поврат на парите за купените билети.
— Да бидам искрен, филмот секако не беше по мој вкус. Повеќе ме возбуди тоа што се случи отколку самиот филм — се пошегува Родригез.
Вер е уапсен под сомнение дека извршил полесен облик на физички напад, соопшти полицијата во Бурбанк.
