Според официјалните податоци, од почетокот на годината во Соединетите Држави се регистрирани повеќе од 5.000 случаи на мали сипаници – што претставува највисока годишна бројка во последните 35 години, објави денеска „Еуроњуз“ (Euronews).
Податоците од Центрите за контрола и превенција на болести (CDC), главната американска агенција за јавно здравје, покажуваат дека во текот на 2026 година на национално ниво се пријавени вкупно 5.182 потврдени случаи на оваа високозаразна болест, која може да се спречи со вакцинација.
Оваа бројка е повеќе од двојно поголема во споредба со 2.289-те случаи регистрирани во 2025 година и претставува најголем број документиран од страна на CDC уште од 1991 година.
Здравствените власти на ниво на сојузни држави пријавија најмалку осум смртни случаи поврзани со мали сипаници, вклучително и смртни случаи кај многу мали деца.
Смртните случаи предизвикани од мали сипаници се причина за загриженост меѓу медицинските стручњаци.
Во 2000 година, беше прогласено искоренување на малите сипаници во Соединетите Држави, што во голема мера се должеше на широката опфатеност со вакцинација.
Сепак, во последните години, болеста повторно се појави во значителен обем, што се должи на опаѓањето на стапките на вакцинација и зголемената недоверба на јавноста кон здравствените власти, пренесе „Бета“.
