Летовите на аеродромот во Брисел накратко прекинати поради дрон

Контролорите на воздушниот сообраќај во кулата и персоналот за безбедност на аеродромот визуелно го идентификуваа дронот.

Воздушниот сообраќај на аеродромот во Брисел беше накратко прекинат во петокот вечерта откако беше забележан дрон во близина на аеродромот; белгиската агенција за контрола на воздушниот сообраќај „Скејс“ денес соопшти дека леталото е визуелно забележано, активирајќи ги протоколите за дронови и запирајќи го сообраќајот околу 25 минути.

„Контролорите на воздушниот сообраќај во кулата и персоналот за безбедност на аеродромот визуелно го идентификуваа дронот“, изјави Курт Верхулген од Скејс за белгискиот весник „Ниусблад“.

Тој нагласи дека е должност на контролорите да реагираат на начин што ќе ја гарантира безбедноста на патниците и екипажот.

„Им дадовме инструкции на авионите што требаше да слетаат да кружат во зоната за чекање. Не можевме да ризикуваме да им дозволиме да слетаат“, рече Верхулген.

Како резултат на тоа, авионите кружеа околу аеродромот некое време или беа пренасочени кон други аеродроми.

Откако беше утврдено дека ситуацијата повторно е безбедна, воздушниот сообраќај беше обновен.

Првите авиони добија дозвола за слетување на аеродромот во Брисел во 22:10 часот.

Според портпаролот на аеродромот, влијанието на инцидентот беше ограничено на три пренасочени летови што требаше да се вратат во Завентем.

Два авиона беа пренасочени кон аеродромот Остенде, а еден кон Лиеж.

Според достапните информации, другите летови не беа одложени, пренесува „Танјуг“.