Планот на Трамп со Путин пред крах! Танкерите со руски дизел наместо кон САД, го менуваат курсот

Планот на американскиот претседател Доналд Трамп за ублажување на недостигот од гориво и намалување на цените во САД преку увоз на руски дизел се соочува со сериозни пречки. Како што пренесува „Фајненшел тајмс“, два танкера кои првично се упатиле кон американскиот брег го промениле курсот, додека залихите на дизел во САД паднале на нивоа што не се забележани повеќе од 20 години.

Пред изборите на средината на мандатот, Трамп договорил набавка на руски дизел од рускиот претседател Владимир Путин, во обид да го намали притисокот врз американските потрошувачи предизвикан од високите цени на горивата.

Сепак, политичките околности оттогаш драстично се променија. Републиканците претрпеа тежок изборен пораз, а демократите обезбедија мнозинство во двата дома на Конгресот – развој на настаните што дополнително ја усложнува реализацијата на договорот на Трамп со Москва.

Во меѓувреме, залихите на дизел во САД паднаа под 100 милиони барели за првпат по повеќе од две децении, при што недостигот од гориво претставува сè посериозен проблем за економијата – особено за транспортниот сектор и синџирите на снабдување.

Според податоците за следење на пловила, на кои се повикува „Фајненшел тајмс“, танкерот „Леруо“- кој плови под знамето на Сиера Леоне – во понеделникот ја променил својата дестинација и сега се упатува кон Бразил.

Пловидлото е во сопственост на компанија со седиште во Хонгконг и подлежи на санкции воведени од Европската унија, Обединетото Кралство и Канада. Сличен потег направи и рускиот танкер „Талисман“, кој исто така е предмет на санкции од САД, Велика Британија и Европа.

Наместо да го продолжи патувањето преку Атлантикот, танкерот се вратил кон Средоземното Море и моментално се наоѓа во близина на Алжир. Како негова дестинација е наведено „чекање на дополнителни инструкции“, што значи дека пристаништето за истовар сè уште не е утврдено.

Третиот танкер, „Агиои Фанендес“, кој е во грчка сопственост, моментално го продолжува патувањето кон САД. Сепак, сè уште не е потврдено каде тој ќе го истовари својот товар. Компанијата „Eastern Mediterranean Maritime“ претходно изјави дека бродот чека упатства во врска со неговата крајна дестинација.

Во меѓувреме, танкерот „Beast“ – кој на 27 октомври во пристаништето Приморск натовари руски дизел – исто така се упати кон американскиот брег. И овој брод подлежи на санкции, а како негова дестинација моментално е наведен само Атлантскиот Океан.

Обидот за увоз на руски дизел наиде на противење од страна на демократите, како и од некои републикански членови на Конгресот.

Одредени членови на Конгресот предупредуваат дека спроведувањето на договорот би можело да претставува прекршување на американските санкции и закони, поради што бараат негово поништување.