Корпорациите за преработена и брза храна го попречуваат решението за проблемот со гојазноста

Најголемите светски корпорации за ултра-преработена храна ги попречуваат глобалните напори за справување со кризата со дебелината со поднесување тужби против владите кои се обидуваат да промовираат поздрава исхрана, изјави денес генералниот директор на Светската здравствена организација (СЗО), Тедрос Аданом Гебрејесус.

Тој ги обвини глобалните прехранбени компании за попречување на усвојувањето на витални мерки за подобрување на јавното здравје и потсети дека милијарди долари се издвојуваат низ целиот свет за здравствени услуги и судски трошоци, објавува Гардијан.

Речиси милијарда луѓе низ целиот свет живеат со дебелина, а нездравата исхрана е една од главните причини за срцеви заболувања, рак и дијабетес тип 2.

Консумацијата на ултра-преработена храна (УПХ) расте и сега сочинува половина од просечната исхрана во многу земји, вклучувајќи ги Велика Британија, САД и Австралија.

Владите низ целиот свет, свесни за здравствените и економските последици од кризата со дебелината, почнаа да воведуваат мерки дизајнирани да го намалат внесот на брза храна и да промовираат поздрава исхрана.

Тие вклучуваат предупредувања на предната страна од пакувањето и ограничувања за маркетиншки и рекламни кампањи за нездрави производи, пренесува „Танјуг“.