Најновиот предлог на Иран повикува на решавање на спорните прашања со САД во рок од 30 дена за да се стави крај на војната, наместо едноставно да се продолжи сегашниот прекин на огнот, објавија иранските државни медиуми.
Претседателот на САД, Доналд Трамп, изјави во саботата дека разгледува нов ирански предлог, но изрази сомнежи дека тоа ќе доведе до договор.
Тој додаде на социјалните медиуми дека Иранците „сè уште не платиле доволно висока цена за она што му го направиле на човештвото и на светот во последните 47 години“ од Исламската револуција.
Јусеф Пезешкијан, син и советник на претседателот Масуд Пезешкијан, напиша на „Телеграм“ дека и САД и Иран се сметаат себеси за победници во војната и не се подготвени да се откажат.
Во Техеран беше поставен голем постер со зборовите „На работ на раскинување“ и фотографија од зашиената уста на Доналд Трамп над која е прикажан поглед на Ормускиот теснец.
Предлогот на Иран од 14 точки, кој е одговор на планот од девет точки на САД, повикува на укинување на американските санкции врз Иран, крај на американската поморска блокада на иранските пристаништа, повлекување на силите од регионот и прекин на сите непријателства, вклучително и израелските операции во Либан, според новинските агенции „Нур њуз“ и „Тасним“, кои имаат блиски врски со безбедносните служби на Иран.
Сепак, во извештаите за предлогот не се споменуваат нуклеарната програма на Иран и збогатувањето на ураниум, кои долго време беа централни прашања за Соединетите Американски Држави, но Техеран ќе се справи со нив подоцна, во мирно време.
Иран го испрати предлогот преку Пакистан, кој минатиот месец беше домаќин на разговорите меѓу Иран и САД.
Премиерот, министерот за надворешни работи и началникот на Генералштабот на Пакистан инсистираат разговорите да продолжат и ги охрабруваат САД и Иран да разговараат директно, според двајца функционери во Пакистан кои зборуваа под услов на анонимност.
Кршливото тринеделно примирје се чини дека се одржува, иако Трамп им рече на новинарите во саботата дека е можна обнова на војната.
Иранскиот министер за надворешни работи, Абас Арагчи, денес разговараше со министерот за надворешни работи на Оман, Бадр ал-Бусаиди, кој ги надгледуваше разговорите меѓу САД и Иран пред војната.
Трамп понуди план за повторно отворање на Ормутскиот теснец, портата од Индискиот Океан и Оманскиот Залив до Персискиот Залив, низ кој мирно минуваат една петтина од светската трговија со нафта и природен гас, како и многу потребното ѓубриво за земјоделците ширум светот.
Блокадата на теснецот од страна на Иран, наметната откако САД и Израел влегоа во војна на 28 февруари, го шокираше светот.
Заменик-претседателот на иранскиот парламент, Али Никзад, денес изјави дека Техеран „нема да се откаже од својата позиција во врска со Ормускиот теснец и нема да се врати на ситуацијата пред војната“.
Никзад го повтори ставот на Иран дека секој брод што не е поврзан со САД или Израел може да помине низ Ормускиот теснец ако плати патарина. Техеран го затвори теснецот со напаѓање и заканување на бродови.
Денес, вториот ден од иранската работна недела, ријалот дополнително ослабе во однос на американскиот долар: во менувачницата во Техеран, еден долар се менуваше за 1,84 милиони ријали. Аналитичарите веруваат дека постои голема можност валутата дополнително да падне.
Според извештаите на иранските медиуми, неколку фабрики не ги обновија своите договори со работниците во март, а значителен број ги загубија своите работни места, пренесе „Бета“.
