Инвестицискиот ризик ќе се приспособува според возраста на осигурениците

Во прво читање денеска беа поддржани законските измени со кои се предвидува средствата на пензиските осигуреници во приватните пензиски фондови да се инвестираат согласно со нивната возраст, временскиот период до пензионирање и подготвеноста за преземање инвестициски ризик. Комисијата за социјална политика, демографија и млади и Законодавно-правната комисија денеска расправаа и ги проследија во натамошна собраниска процедура предлог-законите за изменување и дополнување на законите за задолжително и доброволно капитално финансирано пензиско осигурување.

Со предложените измени се воведуваат три инвестициски портфолија – растечко, балансирано и конзервативно, кои ќе се разликуваат според нивото на ризик и структурата на вложувањата. Според предложениот модел, осигурениците до 45 години ќе можат да избираат меѓу растечкото и балансираното портфолио, лицата од 45 до 57 години ќе имаат можност за избор на сите три, додека оние над 57 години ќе можат да ги изберат балансираното и конзервативното портфолио.

Растечкото портфолио ќе овозможува преземање поголем инвестициски ризик со потенцијално повисок принос на долг рок. Балансираното ќе нуди умерен однос меѓу ризикот и приносот, а конзервативното ќе биде насочено кон поголема заштита на акумулираните средства. Доколку осигурениците не изберат портфолио, предвидена е автоматска распределба според нивната возраст.

Измените имаат цел да овозможат пофлексибилно управување со пензиските заштеди и подобро приспособување на инвестициската стратегија во различните фази од животот.