Инцидент во Узбекистан: Поранешен италијански амбасадор е уапсен за продажба на шенген визи на Руси

Поранешниот италијански амбасадор во Узбекистан, Пјергабриеле Пападија, беше уапсен денес во Рим под сомнение за организирање шема за издавање шенген визи во италијанската амбасада во Ташкент, објавија денес италијанските медиуми.

Според истрагата, Пападија ја доверил контролата врз одделот за визи за време на неговиот мандат во Узбекистан на Татјана Тараканова, со која претходно работел во италијанскиот конзулат во Москва.

Двајцата се под истрага од страна на обвинителството во Рим под сомнение за олеснување на нелегалната имиграција и корупција поврзана со дејствија спротивни на службените должности, според Ла Република.

Службениците на италијанската финансиска гарда спроведоа мерки на претпазливост по наредба на истражниот судија Аналисе Марчијано. Пападија беше уапсен и ставен во затвор до завршувањето на истрагата, откако претходно беше суспендиран од функцијата.

Истражителите се сомневаат дека, со помош на Тараканова, тој организирал систем за издавање долгорочни туристички визи за руски државјани, со важност од една до три години, иако тие не ги исполнувале условите за влез во Шенген зоната. Наводно, тој наплаќал помеѓу 4.000 и 16.000 евра по лице за услугите.

Според истрагата, три туристички агенции од Москва биле вклучени во шемата, а најмалку 95 руски државјани влегле во Италија преку овие канали без потребните услови за виза. Обвинителството и финансиската полиција продолжуваат да истражуваат околу 400 случаи, како и да ја проверуваат имовината на Пападија, проценета на околу три милиони евра, за која тој тврди дека доаѓа од наследство, објавува „Ла Република“.