Хегсет: САД се подготвени повторно да го нападнат Иран ако не се постигне договор

Министерот за одбрана на САД, Пит Хегсет, изјави во понеделник дека САД се подготвени да започнат обновени напади врз Иран ако не се постигне договор, додека Вашингтон и Техеран продолжуваат со разговорите за надминување на клучните разлики што го блокираат договорот.

Хегсет изјави на Форумот Шангри-Ла за одбранбени лидери, војска и дипломати дека САД се „повеќе од способни“ за таква опција и дека нивните резерви на оружје се „повеќе од доволни“, нагласувајќи дека земјата е во „многу добра позиција“, објави „Ројтерс“.

Тој додаде дека САД не му го свртеле грбот на Азиско-пацифичкиот регион и покрај тековниот конфликт со Иран.

„Можеме да направиме две работи одеднаш. Ја зајакнуваме нашата одбранбена индустриска база за да можеме наскоро да произведеме два, три или четири пати повеќе муниција“, рече Хегсет.

Тој додаде дека американскиот претседател Доналд Трамп сака да постигне „голем договор“ што ќе осигури дека Иран нема да се здобие со нуклеарно оружје.

Средбата на Трамп со советниците за национална безбедност за можен договор со Иран заврши во петокот по два часа без одлука, изјави за „Њујорк тајмс“ висок функционер на администрацијата, додавајќи дека разговорите се уште се блиску до договор, но дека одредени прашања, вклучително и одмрзнувањето на иранските средства, остануваат нерешени.

Зборувајќи за односите меѓу САД и Кина, американскиот министер за одбрана Пит Хегсет рече дека тие се подобри отколку во претходните години, благодарение на лидерството на американскиот претседател Доналд Трамп, но во исто време предупреди на брзиот подем на азиска воена сила.

Зборувајќи на годишниот форум за безбедност на Азија Шангри-Ла, Хегсет рече дека постои „оправдана тревога“ во Индо-Пацификот поради „историското јакнење на војската на Кина и проширувањето на нејзините воени активности во регионот и пошироко“, објави „Кјодо“.

Американскиот секретар додаде дека Соединетите Американски Држави, заедно со своите сојузници, ќе спречат „секој хегемон“ да доминира во Азија и „да ја наруши регионалната рамнотежа на моќ“ и „да ја поткопа рамнотежата што сите се стремат да ја зачуваат“.

„Не пристапуваме кон овој предизвик со непотребна конфронтација, туку со став на измерена и намерна сила. Нашиот фокус е силен, тивок и јасен“, рече Хегсет.

Тој нагласи дека одржувањето отворени линии на комуникација меѓу САД и Кина е клучно за намалување на ризикот од погрешни пресметки.

За да се обезбеди мир и просперитет во Азија, која ја опиша како најдинамичниот економски регион во светот, Хегсет ја повика Кина да го почитува долгогодишното присуство на Соединетите Американски Држави во регионот, нагласувајќи дека Соединетите Американски Држави се тихоокеанска нација.

Неговите забелешки дојдоа две недели по самитот меѓу американскиот претседател Доналд Трамп и кинескиот претседател Си Џинпинг во Пекинг, за време на кој двете страни дадоа приоритет на стабилизирањето на односите меѓу двете сопернички сили пред решавањето на големите геополитички и економски прашања, пренесува „Танјуг“.