ГРЦИЈА ВО ПЛАМЕН: Старите пожари се уште активни, се разгоруваат нови жаришта со ветер од 150 км/час

Грчките пожарникари продолжуваат да се борат со повеќе активни пожари низ целата земја, а нови фронтови се појавуваат во регионот Арголис, во близина на археолошкото наоѓалиште Микена и во Беотија, каде што се издадени бројни предупредувања за евакуација.

Пожар во регионот Фиктиција во Арголис, во близина на Микена, доведе до затворање на Стариот национален пат, додека пожарникарите се обидуваат да го локализираат пламенот, објави Прототема.

Во Беотија, пожарот се проширил до селото Ксирономи, каде што, според првичните извештаи, изгореле земјоделски машини, згради и бачило. Пожарникарите продолжуваат со напорите за заштита на домовите и имотот на жителите.

Градоначалникот на Теба, Јоргос Анастасиу, го опиша пожарот во Беотија како „сериозен и опасен“ и рече дека силните ветрови ја влошуваат ситуацијата уште повеќе. Пожарот најмногу ги зафатил руралните области со маслинови насади, а евакуациите се во тек.

Во Ретимно, Крит, продолжи борбата против големиот пожар кој веќе уништи околу 45.000 хектари земја за два дена. Операцијата за гаснење започна без помош на воздухопловните сили поради силните ветрови кои ги спречуваат летовите на авионите за гаснење.

Најзагрозени подрачја се Крија Вриси и Асоматос, каде што пожарникарите се обидуваат да спречат повторно разгорување на пожарот. Истрагата за причината за пожарот во Ретимно покажа дека пожарот најверојатно започнал поради електричен столб, а уапсен е службено лице на компанијата ДЕДИЕ. Двајца пожарникари загинаа во пожарот.

Поради високиот ризик од нови пожари, во некои делови од Халкидики е воведена забрана за движење на возила во шумски подрачја, а метеоролошките служби предупредија на многу силни ветрови во Атика и Егејското Море.

Налетите на североисточен ветер на некои локации надминаа 100 километри на час, а на планината Пентели во близина на Атина достигнаа 150 километри на час.