Грција го претстави „Дедал“ можниот суперкомпјутерсо брзина од 85,69 петафлопси

Грција го претстави новиот суперкомпјутер, „Дедал“ (Daedalus), кој со брзина на обработка од 85,69 петафлопси отвора нови можности за развој на напредни модели на вештачка интелигенција во земјата.

„Дедал“ е најмоќниот суперкомпјутер некогаш инсталиран во Грција. Според достапните податоци, системот – во кој се инвестирани 58,9 милиони евра – се наоѓа на 31-то место во светот според компјутерската моќ.

Како што пренесува „Еуроњуз“, целта на грчкиот суперкомпјутер е да го поттикне домашното технолошко производство и да ја намали зависноста од компјутерски капацитети лоцирани во странство.

Στα εγκαίνια του νέου εθνικού υπερυπολογιστή «Δαίδαλος», του ισχυρότερου υπολογιστικού συστήματος που έχει αποκτήσει η Ελλάδα έως σήμερα. pic.twitter.com/HiTVORm3gq

— Prime Minister GR (@PrimeministerGR) October 19, 2026

„Дедал“ создава средина која им овозможува на универзитетите, истражувачките центри, деловните субјекти, јавните институции и здравствените организации да развиваат и обучуваат напредни модели на вештачка интелигенција (ВИ), да обработуваат огромни количества податоци и да спроведуваат сложени пресметковни проекти, користејќи инфраструктура лоцирана во Грција.

Суперкомпјутерот е сместен во историската зграда на поранешна електрана во Технолошкиот и културен парк „Лаврион“ (Lavrio), кој функционира под покровителство на Националниот технички универзитет во Атина. Националната инфраструктура за истражување и технологија (EDYTE – GRNET) ја презеде одговорноста за управувањето и техничкото функционирање на системот, а исто така го надгледуваше и спроведувањето на проектот.

Грчкиот министер за дигитално управување и вештачка интелигенција Димитрис Папастергиу ги спомена и Македонија, Србија, Кипар и Малта како земји со кои постојат можности за регионална соработка во користењето на новата технолошка инфраструктура. Истовремено, Грција подготвува уште еден суперкомпјутер во Кожани, за кој е предвидена набавка на опрема и софтвер во вредност од 21,57 милиони евра.

Со овие инвестиции, Грција настојува да ја зајакне својата позиција во европскиот технолошки сектор и да создаде услови за развој на нови компании и услуги засновани на вештачка интелигенција.