Грчкиот поет Сотирис Минас, кој сам го научил македонскиот јазик, денеска (19 септември), во Скопје, лично ќе ја промовира „Раскинување на договорот“ – книга во која солидарноста со Македонија и личната побуна проговоруваат со ист глас. Промоцијата на книгата ќе се одржи во книжарницата на „Матица македонска“ на Булеварот на книгите во Скопје, во 12 часот. За книгата ќе говори писателот и книжевен критичар, Иван Антоновски.
Минас не го наследил македонскиот јазик – го избрал. Иако нема македонско потекло, сам го научил, на него ги препеал сопствените песни и својата прва поетска книга ја објавил токму во Македонија, напоредно на грчки и на македонски. Тој избор не останува само израз на наклонетост: станува јавно залагање за македонскиот јазик, за македонскиот идентитет и за достоинството на луѓето на кои им припаѓаат.
„Мојата одлука да ја објавам оваа збирка во Македонија е свесен чин на правда. Ова издание е мој директен судир со деценискиот молк и лаги“, пишува Минас во авторската белешка.
Двојазичноста за него е практично признавање на македонскиот идентитет, чин на солидарност и повик за заемна почит. Неговата порака е недвосмислена: „Цврсто верувам дека помирувањето започнува единствено преку прифаќањето на постоењето на другиот“.
Неговото читање на песната „Ми го одзедоа јазикот – македонскиот“ на Струшките вечери на поезијата беше поздравено со силен аплауз. Неговите објави на социјалните мрежи добија поддршка, но беа проследени и со навредливи коментари и закани од грчки националисти. Затоа, зад јавниот одглас на неговото творештво, стои и прашањето за личната храброст: што значи да се застане зад македонскиот јазик и тогаш кога тој избор предизвикува напади?
Во „Ми го одзедоа јазикот – македонскиот“, создадена по инспирација од „Ми го дадоа јазикот – грчкиот“ на Одисеас Елитис, Минас отвора поетски дијалог со македонското паметење. Низ пределите, исчезнатите села и зборовите што опстојуваат, проговорува за правото на мајчиниот јазик како неделив дел од човечкото достоинство. Особената сила на оваа песна е во тоа што грчки поет му дава глас на македонското искуство: солидарноста не ја искажува оддалеку, туку и на јазикот на оние кон кои ја упатува.
Истовремено, „Раскинување на договорот“ е длабоко лична книга за љубовта, загубата, ранливоста и ослободувањето од туѓите мерила. Во нејзиното средиште е човекот што одбива друг да ја определува неговата вредност и да ги поставува условите за неговото постоење.
