Францускиот Уставен совет денес го поддржа законот што дава право на евтаназија, или потпомогнато самоубиство.
Долгоочекуваната одлука, која беше меѓу најсериозните и најчувствителните прашања за членовите на Уставниот совет во последните години, беше поздравена од францускиот претседател Емануел Макрон, соопшти Елисејската палата.
Макрон ја поздрави одлуката на Уставниот совет, која, според Елисејската палата, „завршува примерна демократска дебата“ и „обезбедува суштинска гаранција“ за француските граѓани, објави „Ле Фигаро“.
Во соопштението од кабинетот на францускиот претседател се вели дека одлуката „ја зајакнува рамнотежата на текстот усвоен од парламентот“ и дека „сега е можно да се продолжи со спроведувањето на оваа реформа со сигурност дека таа се потпира на целосно воспоставени демократски, етички и уставни основи“.
Судот отфрли бројни приговори за суштината на законот, од дефиницијата на правото на асистирано умирање до критериумите за подобност, но издаде три препораки, од кои најважната се однесува на слободата на институциите да не обезбедуваат услуги за евтаназија или асистирано самоубиство во своите простории.
Фармацевтите исто така треба да можат да се повикаат на клаузулата за совест за да одбијат да учествуваат во подготовката и издавањето на смртоносна супстанција, одредба што не е вклучена во текстот усвоен од пратениците.
Третата препорака се однесува на законски заштитените возрасни лица, особено оние со интелектуална попреченост, во чиј случај Уставниот совет пресуди дека лекарот што разгледува барање за асистирано самоубиство мора да го земе предвид мислењето на лицето одговорно за мерката за правна заштита, пренесе „Танјуг“.
