EPA-EFE/ANGELO CARCONI

Папата Франциск почина во понеделникот на 88-годишна возраст. Од него се простуваат бројни верници, политичари, спортисти… Аргентинскиот фудбалски великан Лионел Меси во понеделникот му се заблагодари на папата Франциск што „го направи светот подобро место“, додека омилениот клуб на покојниот понтиф, Сан Лоренцо, ја пофали неговата децениска „страст“ за тимот.

Сан Лоренцо ја украси својата почетна страница со голема фотографија од насмеаниот Папа под амблемот на клубот со сино-црвени линии, заедно со зборовите: „Збогум засекогаш, свети оче!

„Почесен член на нашиот клуб, неговата страст за Сан Лоренцо отсекогаш нè допирала на посебен начин и нè обединува во постојана молитва за неговата душа“, се вели во соопштението на клубот со фотографии на кои папата ги држи или позира со ознаките на Сан Лоренцо. Клубот, исто така, му оддаде почит на Франциск како „промислен, отворен, културен човек целосно посветен на своите верувања и светоглед“, пренесува France24.

Папата го следи Сан Лоренцо – основан од свештеник во 1908 година – уште од детството. Како член на клубот, додека беше надбискуп, неколку години служеше миса во клупската капела во Буенос Аирес по повод годишнината на Сан Лоренцо. Неколку дресови на неговиот сакан клуб беа изложени во Ватикан кога тој стана папа. Минатата година, делегација предводена од претседателот на клубот Марсело Морети го посети папата Франциск и предложи идниот стадион на тимот да го носи неговото име. Трогнат, Светиот Отец без двоумење прифати“, соопштија од клубот. Изградбата треба да започне оваа година.

По смртта на папата, на социјалните мрежи се појави фотографија од неговата членска книшка, а некои истакнаа дека зад членскиот број постои значење. Имено, членскиот број е 88235, а корисниците на социјалните мрежи тоа го поврзаа со времето на неговата смрт – папата Франциско почина на 88-годишна возраст, во 2 часот и 35 минути по аргентинско време.

ИЗДВОЕНИ

ПОВРЗАНИ ОБЈАВИПОВЕЌЕ ОД АВТОРОТ