„Форбс“ анализира: Владимир Путин е во терминална фаза од своето владеење, ќе падне за најмногу три години

Додека страда Русија од недостиг на гориво, воената полиција на улица апси мажи за да ги носи на фронт, а нивните роднини лежат пред полициските автомобили и прашуваат зошто тие режимски бандити што вршат насилна мобилизација самите не одат на фронт. Обичните луѓе се прашуваат дали е виновен Путин за сè или корумпираната елита го држи во информативна изолација за да не разбере колку е критична ситуацијата. Мистериозните ликвидации во рамките на режимот создаваат огромен проблем за Путин, зашто преостанатите членови на елитата сфаќаат дека се следни на ред и одлучуваат да почнат превентивен удар против диктаторот за да се спасат

Рускиот претседател, Владимир Путин, е во терминална фаза од своето владеење. Кога подетално ќе се разгледаат акутноста на неговата ситуација, потенцијалните исходи и временските, станува јасно дека е близу неговиот крај, заклучува во својата обемна анализа магазинот “Форбс“. Анализата нуди повеќе причини што водат до тој заклучок, почнувајќи од незадоволството на народот од актуелниот недостиг на гориво, преку насилната регрутација, стравот на елитата дека ќе биде прва жртва при евентуалниот излив на гнев на народот, до видеата што укажуваат на зголемено незадоволство кај војската.

Поради постојаните напади од украински беспилотни летала, Кримскиот Полуостров е практично отсечен од снабдувањето со гориво. Километарските конвои автомобили со луѓе што се обидуваат да избегаат од полуостровот во средината на туристичкиот шпиц, во јавноста испраќаат слика на катастрофа. На Русите им останува само една маршрута за испорака на гориво: Керченскиот мост, а украинските разузнавачки извори потврдуваат дека нападот врз оваа цел во голем обем е прашање на време. Неодамнешната изјава на Александар Лунин, пишува „Форбс“, покажува дека самиот систем опасно врие.

Овој руски воен блогер и ветеран од инвазијата врз Украина објави видео во кое отворено предупредува за бунт во војската и, конечно, бара директно интервју со Путин на телевизија, тврдејќи дека поседува строго доверливи тајни што му ги откриле високи команданти, кои тој лично мора да му ги пренесе на претседателот. Видеото брзо доби огромни 11 милиони прегледи. Потоа групи војници што го поддржуваат објавија видео во кое се закануваат дека ќе го свртат оружјето кон сопствените офицери кои ги злоупотребуваат. Лунин брзо беше ставен зад решетки, но во руската јавност целиот случај го оживеа духот на неуспешниот бунт на Евгениј Пригожин.

Видеата од успешни украински напади врз воените објекти, електричните мрежи и складиштата за гориво околу Москва, како и во оддалечените руски региони, постојано циркулираат на социјалните мрежи. Руските инфлуенсери низ солзи снимаат како никаде не може да најдат гориво за своите автомобили. Истовремено, на Интернет кружат драматични слики на кои се гледа како воената полиција буквално киднапира мажи на улица и ги тера да влезат во полициски автомобили за на фронт, додека нивните роднини се обидуваат да ги блокираат возилата со своите тела. Логично, сè погласно се поставува едно клучно прашање на улиците на руските градови: зошто режимските бандити што ја спроведуваат мобилизацијата самите не одат на фронт?

Како што расте притисокот врз Путин, елитата околу него почнува да паничи за сопствената судбина. Обичните луѓе може да заклучат само две работи од ова: или самиот Путин е виновен за сè или корумпираната елита го држи во информативна изолација за да не разбере колку е критична ситуацијата. Народот првично ќе ја обвини елитата и токму затоа таа прва ќе се побуни, дури и пред самата армија, од чист страв за сопствениот живот, анализира „Форбс“. Магазинот потсетува дека Путин има цела низа одбранбени механизми, еден вид преторијанска гарда. Тој ги користел безбедносните формации со години за да се контролираат едни со други и за да го одржуваат стравот во рамнотежа, но сега секоја од овие служби претставува и огромна закана, бидејќи нејзините членови им се првенствено лојални на своите непосредни претпоставени. Конфликтот и отворената војна меѓу овие кланови се едно од најверојатните сценарија во Кремљ.

Како ќе изгледа крајот на Путин во голема мера зависи од тоа каков исход планираат оние што ја сакаат неговата глава. Брзата ликвидација и непосредната борба за власт бараат целосна неутрализација на неговата закана пред да може да реагираат лојалните. Дека ваквите темни сценарија се многу реална закана за режимот сугерира и неодамнешната мистериозна смрт на Сергеј Иванов, долгогодишен близок сојузник и пријател на Путин.

Ваквите мистериозни ликвидации во рамките на режимот создаваат огромен проблем за Путин, зашто  преостанатите членови на елитата сфаќаат дека се следни на ред и одлучуваат да почнат превентивен удар против диктаторот за да се спасат. Паранојата во Кремљ расте, а повод за конечниот пад може да биде сè: нови драматични украински напади врз самата Москва, масовен недостиг на храна, сецесионистички востанија во автономни региони како Татарстан, Башкортостан и Чеченија или влегување на украинската армија на Крим.

Сепак, клучот за судбината лежи во Кина. Ако одлучи Пекинг дека ослабениот Путин станал преголем товар за сопствените геополитички и економски интереси, би можел да го собори на повеќе начини – од целосно прекинување на воената помош до економско задушување.

Доколку продолжат сегашните случувања со ова темпо или дополнително се влошат, падот на Владимир Путин ќе се случи во рок од најмногу три години, заклучува „Форбс“.