Фон дер Лајен најави 50 милиони евра за заштита на Црното Море

ЕУ ќе обезбеди финансиска помош за заштита на Црното Море по нападите врз трговските бродови – напади за кои се смета дека е одговорна Русија – изјави претседателката на Европската комисија, Урсула фон дер Лајен. Оваа најава доаѓа во момент кога на други фронтови се одвиваат клучни дипломатски преговори за решавање на кризата, пренесува „Политико“.

„Заканите, нападите и упадите стануваат сè почести долж брегот на Црното Море“, изјави Фон дер Лајен на почетокот на нејзината посета на Романија. Како одговор на тоа, таа најави дека Унијата ќе го „забрза формирањето на Црноморски центар за поморска безбедност, со јасен рок за завршување и обезбедени средства во висина од 50 милиони евра“.

Дополнително, таа вети уште 10 милиони евра од фондовите на ЕУ за романските служби за пребарување и спасување. Сепак, овие суми се значително помали од 16,7 милијарди евра што Романија ги добива преку програмата за заеми на ЕУ, наречена SAFE, наменета за одбрана и вооружување.

Центарот, чие формирање беше најавено минатата година, ќе функционира како заеднички контролен центар со кој ќе управуваат Романија и Бугарија; се очекува тој целосно да профункционира до крајот на годината. Негова цел е да ги следи поморските активности во реално време и да ја штити критичната инфраструктура, како што се подводните енергетски и комуникациски кабли.

Двете земји ќе добијат единствен увид во состојбата на море и во воздухот, што ќе им овозможи да ги детектираат заканите пред да дојде до напади.