Фармацевтите не се заинтересирани за хантавирусот: „Нашата кутија со алатки е речиси празна“

Епидемијата на хантавирус на крузерот MV Hondius го привлече вниманието кон редок, но смртоносен вирус за кој нема широко достапни вакцини или целни терапии, објавува „Њујорк тајмс“ (NT). Според анализата на весникот, научниците велат дека со години се работи на развој на вакцини и лекови, но дека интересот од фармацевтските компании е ограничен бидејќи хантавирусот не е меѓу приоритетните закани за јавното здравје.

„Тоа е еден вид повик за будење. Нашата „кутија со алатки“, така да се каже, е речиси празна“, рече Ваити Арумугасвами, истражувач на Универзитетот во Калифорнија, Лос Анџелес.

Вирусот поврзан со епидемијата на крузерот е вирусот од Андите, единствениот познат хантавирус што може да се пренесува меѓу луѓето, објавува „NT“.

Џеј Хупер, виролог во Институтот за медицински истражувања за заразни болести на американската армија, рече дека хантавирусите не се високо на списокот на приоритети за превенција од пандемија.

„Не е многу заразен вирус што се пренесува преку воздух“, рече Хупер.

Тој рече дека неговиот тим развил ДНК вакцина против вирусот од Андите што покажала охрабрувачки резултати во испитувањата во рана фаза.

„Постигнавме неутрализирачки антитела кај повеќе од 80 проценти од испитаниците. Тоа е импресивно“, рече Хупер.

Моментално, третманот е во голема мера поддржувачки, додека истражувачите работат и на развој на терапии со антитела од крвта на преживеаните пациенти.

„Успеавме да ги изолираме природните антитела што ги произведуваат луѓето и да пронајдеме неколку кои се многу ефикасни“, рече вирологот Картик Чандран.

Експертите проценуваат дека сегашната епидемија би можела да го зголеми интересот за истражување на хантавирусот и да го забрза развојот на вакцини и терапии, додава „Њујорк тајмс“.