Екстремната топлина – “тивок убиец“: НАД ИЛЈАДА ЛУЃЕ починаа за седум дена 

Светската здравствена организација (СЗО) објави дека повеќе од 1.300 луѓе починале поради топлотниот бран што ја погоди Европа од 21 јуни.

– Повеќе од 1.300 дополнителни смртни случаи се регистрирани од 21 јуни во врска со високите температури во Европа. Топлинскиот стрес често се нарекува „тивок убиец“, а европските домови, работни места и училишта не се изградени за овие температури – беше наведено на платформата X.

Според извештаите, поради климатските промени и глобалното затоплување, феноменот на топлотни бранови што се случува „еднаш во генерација“ сега се случува речиси секоја година.

Директорот на СЗО предупреди дека Европа е континентот што најбрзо се затоплува и дека здравствените системи, како и инфраструктурата, се повеќе се изложени на притисок поради екстремни временски услови.

– Европа е континентот што најбрзо се затоплува на Земјата, затоплувајќи се двојно побрзо од глобалниот просек. Моментално, 150 милиони луѓе живеат во екстремна топлина, стотици починаа, училиштата се затворени, мрежите се во прекин – нагласи тој.

Додаде дека Светската здравствена организација работи со своите земји-членки и партнери за справување со заканите по здравјето што ги претставуваат екстремната топлина, „фокусирајќи се на подготвеност, превенција и посилни одговори на здравствениот систем“.

Предупредувањето доаѓа откако беа соборени рекорди на температура низ целиот континент, вклучително и во Германија, Полска и Чешка, каде што беа забележани екстремно високи температури за ова време од годината.

Германија, според прелиминарните податоци, забележа рекордна температура од 41,7 степени Целзиусови, Полска забележа историски максимум од 40,5 степени, а Чешка 41,1 степени.

Француското Министерство за здравство соопшти дека од среда во земјата имало околу 1.000 смртни случаи повеќе од очекуваното.

Во соопштението се вели дека голем број дополнителни смртни случаи се кај лица над 65 години, а е забележано и зголемување од 40 проценти на бројот на луѓе што умираат дома.