Една мајка, две химни: Браќа ќе водат војна на Мундијалот 2026!

Светското првенство во 2026 година нема да донесе само борба за највредниот трофеј во фудбалот, туку и емотивни семејни приказни какви што ретко се гледаат на спортската сцена. Дури осум пара браќа ќе бидат дел од најголемиот Мундијал во историјата, а некои од нив би можеле да се најдат на спротивните страни од теренот.

Четири пара ќе настапуваат за исти репрезентации. Меѓу нив се и добро познатите браќа Лукас и Тео Ернандес, кои повторно ќе бидат дел од француската селекција. Лукас беше шампион со Франција во 2018 година, додека Тео ја искористи шансата по повредата на својот брат на Мундијалот во Катар и се етаблираше како еден од клучните играчи на „триколорите“.

За Холандија ќе настапуваат Журиен и Квентин Тимбер. Журиен зад себе има извонредна сезона со Арсенал, додека Квентин продолжува да се развива во Марсеј. Во редовите на Курасао ќе играат Леандро и Жунињо Бакуна, а Капе Верде ќе смета на браќата Ларос и Дерој Дуарте.

Сепак, најголемо внимание привлекуваат браќата кои избрале различни национални тимови. Најпознат пример се Инаки и Нико Вилијамс. Иако потекнуваат од исто семејство, нивните патишта на репрезентативно ниво се разделија – Инаки настапува за Гана, додека Нико е една од најголемите ѕвезди на Шпанија.

Нико го освои фудбалскиот свет со своите настапи во последните години и беше меѓу најбараните играчи во Европа, но остана верен на Атлетик Билбао. Неговиот постар брат Инаки, пак, е вистинска легенда на баскискиот клуб и човек кој постави неверојатен рекорд со години без пропуштен натпревар во Ла Лига. Иако дебитираше за Шпанија, во 2022 година одлучи да го брани дресот на Гана.

Слична приказна носат и браќата Дуе. Дезире Дуе ќе настапува за Франција, додека неговиот брат Гиле го избра Брегот на Слоновата Коска. На различни страни ќе бидат и Брајан Броби од Холандија и неговиот брат Дерик, кој настапува за Гана, како и австралискиот репрезентативец Хари Сатер и неговиот брат Џон, кој го носи дресот на Шкотска.

Ваквите семејни дуели не се новост на светските првенства. Фудбалската јавност сè уште се сеќава на браќата Боатенг, кои станаа првите браќа што се соочиле еден против друг на Мундијал. Но, никогаш досега бројот на вакви приказни не бил толку голем.

Мундијалот 2026 ќе покаже дека фудбалот не е само игра на победи и порази. Понекогаш тоа е приказна за едно семејство, две химни и сон што се остварува на најголемата сцена во светот.