Дипломатските надежи ја спуштија нафтата на најниско ниво од август – цените во слободен пад!

Цените на нафтата се спуштија на најниското ниво од 31 август. Американската сурова нафта (WTI) падна под 88 долари за барел, додека „Брент“ од Северното Море се движи околу 94 долари, објави „Trading Economics“.

Пазарите ги проценуваат изгледите за дипломатско решавање на конфликтот на Блискиот Исток, и покрај тековните напади во регионот. Падот е продолжение на негативниот тренд од претходната недела, кога WTI изгуби 12,8 отсто од вредноста, а „Брент“ 13,3 отсто.

Притисокот врз цените дополнително го зајакна изјавата на американскиот претседател Доналд Трамп, дадена пред средбата со премиерот на Катар. Тој рече дека напади од големи размери врз Иран се малку веројатни, доколку Техеран прифати цврст договор. Сепак, изгледите за дипломатски пробив остануваат неизвесни, бидејќи државниот секретар Марко Рубио ги намали очекувањата за напредок во преговорите.

Тензиите на терен не стивнуваат. Според извештаите, американските сили во текот на ноќта нападнале цели на иранскиот остров Кешм, а во областа на Ормускиот теснец, според наводите, танкер бил погоден од ракета со непознато потекло. Во Јемен, бунтовниците Хути, поддржани од Иран, ги оштетиле канцелариите на „Сауди Арамко“ во Ријад, по што саудиските сили уништиле два ракетни фрлачи.

И покрај безбедносните ризици и зачестените напади врз поморскиот сообраќај, извозот на сурова нафта од Персискиот Залив почна да закрепнува, што би можело да ги ублажи пазарните стравувања од прекини во снабдувањето.