Данската влада планира да воведе туристичка такса во Копенхаген и Орхус, а според информациите на данскиот деловен весник „Børsen“, кои се повикуваат на неколку високорангирани извори од Владата и владин меморандум, посетителите во иднина би морале дополнително да плаќаат за секое ноќевање во овие два града.
Доколку предлогот биде усвоен, туристите за секое ноќевање во Копенхаген и Орхус би плаќале такса од 20 дански круни, односно околу 2,7 евра, со што двата најголеми дански града би ја следеле практиката на бројни други европски туристички дестинации.
Покрај надоместокот за ноќевање, планирано е и воведување посебна такса за крстаречките бродови (крузери), што би претставувало дополнителен извор на приходи од туристите кои во данските градови пристигнуваат по морски пат.
Слични предлози веќе неколку години беа предмет на политички расправи во Данска, но досега ниту еден не е реализиран. Уште во јуни, данската стопанска организација „Dansk Erhverv“ наведе дека тогашната владина програма не предвидувала општа туристичка такса, иако постоела можност за воведување надоместок за патниците на крузерите.
Според новинската агенција „Ritzau“, приходите од новите туристички такси би требало да помогнат во финансирањето на низа значајни даночни олеснувања за кои данската влада во текот на есента ќе се обиде да обезбеди политичка поддршка.
