Црн ден за екипните спортови: Тешки порази за ракометарките, одбојкарките и фудбалерите

Ако во индивидуалните спортови направивме некои позначајни резултати на Медитеранските игри во Таранто, во колективните спортови целосно потфрливме. Македонските репрезентации имаа тежок ден во Таранто, откако ракометарките, одбојкарките и фудбалерите до 20 години забележаа пораз во своите натпревари.

Женската ракометна репрезентација го доживеа вториот пораз на турнирот, но овој пат претрпе вистински дебакл. По поразот од Грција со 31:25, избраничките на Даниела Новеска беа убедливо надиграни од Тунис, кој славеше со неверојатни 43:11. Сè беше решено уште во првото полувреме, кое Тунис го доби со 20:4. Африканската селекција доминираше во сите сегменти, а двете серии од по 6:0 дополнително ја зголемија предноста. Во вториот дел разликата повторно беше 16 гола, а Тунис на крајот стигна до убедлива победа од 32 гола разлика.

Ниту одбојкарките не успеаја да стигнат до позитивен резултат. Македонија загуби од Косово со 3:1, откако противничките ги освоија првите два сета. Нашите репрезентативки успеаја да намалат на 2:1, но Косово го доби четвртиот сет и ги освои бодовите.

За македонските одбојкарки ова беше втор пораз на Игрите, по стартниот неуспех од Турција со 3:0. Во следното коло Македонија ќе има нов тежок предизвик, бидејќи ќе се сретне со Грција.

Пораз доживеа и фудбалската репрезентација на Македонија до 20 години. Нашите млади фудбалери беа поразени од Турција со убедливи 3:0, во натпревар во кој противникот беше подобар во текот на сите 90 минути. Главен херој на Турција беше Оздер Озчан, кој постигна хет-трик и практично сам го реши натпреварот. Македонците имаа свои моменти, но не успеаја посериозно да ја загрозат турската одбрана.

Турција претходно одигра 2:2 против Мароко, додека Македонија на стартот ремизираше без голови со Тунис. Последниот натпревар од групната фаза за македонските фудбалери ќе биде против Мароко, денес од 10:30 часот.

Така, македонските селекции имаа тежок ден во Таранто, но новите предизвици веќе се пред нив и ќе имаат можност да го поправат впечатокот во продолжението на Медитеранските игри.