Цените на нафтата на светските пазари во петокот пораснаа поради загриженоста за можни прекини во снабдувањето, по нападите на јеменските бунтовници Хути врз Ријад, главниот град на Саудиска Арабија, како и инцидентите со нафтени танкери во Ормускиот теснец.
Фјучерсите на нафтата од типот „Брент“ поскапеа за 79 центи, односно 0,9 отсто, достигнувајќи 92,77 долари за барел, додека американската нафта „West Texas Intermediate“ (WTI) за испорака во декември поскапе за 25 центи, на 83,46 долари за барел, пренесува Ројтерс.
И покрај растот на цените, двата референтни типа на нафта се на пат да забележат трет последователен неделен пад. Се очекува „Брент“ оваа недела да поевтини за 3,5 отсто, а американската нафта за речиси шест отсто, поради очекувањата за вишок понуда на пазарот.
Сатору Јошида, аналитичар во „Rakuten Securities“, изјави дека нападите на Хутите врз Ријад повторно ја разгореа загриженоста за можни прекини во снабдувањето со нафта од Блискиот Исток, што поттикна купување.
Дополнителна поддршка за цените доаѓа од очекувањата дека земјите производители на нафта во рамките на групацијата ОПЕК+ ќе продолжат да ги координираат ограничувањата на производството.
Во четвртокот, иранската Револуционерна гарда соопшти дека два нафтени танкера биле погодени од поморски мини во Ормускиот теснец, по што се запалиле. Според проценките на аналитичарите од „UOB Group“, зачестените напади врз танкери – кои во текот на ноември се случувале со зачестеност од приближно еден напад дневно – продолжуваат да претставуваат значителен геополитички ризик за пазарот на нафта.
Министрите од групацијата ОПЕК+ треба да одржат серија состаноци на 29 ноември за да ја утврдат политиката за производство на нафта за 2027 година.
Меѓународната агенција за енергија (IEA) предупреди дека конфликтот на Блискиот Исток предизвикал најголем пореметување во историјата на глобалната трговија со нафта и гас.












