Остануваат без гориво? Бензин на Крим ќе се точи само четири часа на ден

Поради недоволни залихи на гориво, продажбата на бензин на Крим ќе биде ограничена на четири часа на ден, објави шефот на регионот, Сергеј Аксјонов.

„Залихите на гориво во регионот сè уште не ги задоволуваат целосно потребите на жителите. За жал, некои жители на Крим во моментов ќе се соочат со ограничен пристап до бензин. Со зголемувањето на обемот на увоз, ситуацијата ќе се подобри“, напиша Аксјонов во објава на Телеграм, пренесува руското радио РБК.

Аксјонов објави дека дневната количина гориво сега ќе се дистрибуира на бензинските пумпи во две фази, од осум до 10 часот наутро и од 18 до 20 часот.

Како што е најавено, во седум часот наутро, интерактивната мапа на бензински пумпи на Министерството за гориво и енергетика ќе прикажува ажурирани информации за тоа кои пумпи имаат бензин и дизел гориво.

Претседателот на Советот на министри на Крим, Јуриј Гоцањук, претходно објави дека привременото ограничување на горивото од до 20 литри по клиент ќе остане на сила на Крим.

Според регионалниот гувернер Александар Мур, бензинските пумпи во регионот Тјумен пријавуваат прекини во снабдувањето со моторно гориво, што доведува до долги редици.