Белгискиот премиер поднесе оставка, но кралот Филип ја одби

Во петокот, белгискиот крал Филип ја одби оставката на премиерот Барт де Вевер и побара од него „веднаш да ги продолжи преговорите за буџетот“, откако тие претходно оваа недела доживеаја неуспех.

„Кралот одлучи да не ја прифати оставката на премиерот и побара од него веднаш да ги продолжи преговорите за буџетот“, соопшти белгискиот кралски двор во официјалното известување во петокот, пренесува „Политико“.

Де Вевер му ја понуди својата оставка на кралот претходно оваа недела, откако повеќенеделните преговори за буџетот западнаа во ќор-сокак.

Оттогаш, кралот Филип оствари средби со лидерите на петте партии што ја сочинуваат белгиската коалициска влада и заклучи дека постигнувањето договор е сè уште можно под водство на Де Вевер.

„По разговорите со лидерите на петте партии од владејачкото мнозинство, кралот констатираше дека сите тие сакаат преговорите за буџетот да завршат што е можно поскоро… Кралот, исто така, доби официјална потврда од лидерите на петте партии дека нивните политички субјекти се подготвени на отстапки за да се постигне договор во рамките на владата“, се наведува во соопштението од Дворот.

Додека владата се обидува да го покрие буџетскиот дефицит од 10 милијарди евра до 2029 година, коалициските партнери остануваат длабоко поделени околу тоа од каде да се обезбедат потребните средства. Фламанската социјалистичка партија „Вуруит“ (Vooruit) се залага оние со повисоки примања да дадат поголем придонес, но франкофонското централно-десничарско „Реформистичко движење“ го отфрли тоа, истовремено противејќи се и на реформата на данокот на додадена вредност.

Де Вевер, кој претходно ја исклучуваше можноста новата година да започне со привремен буџет, оваа недела потврди дека земјата нема да има друг избор освен да се врати на тој систем.

Според овој систем, на владата ѝ е дозволено секој месец да троши една дванаесеттина од буџетот на претходната година.

„Ова е ужасен неуспех на владата“, изјави Де Вевер пред пратениците додека ја објавуваше својата оставка.

Премиерот повторно ќе се сретне со кралот за десет дена, на 16 ноември, за да го информира за напредокот, соопштија од Кралскиот двор.