Барса никогаш не очекуваше таква шлаканица од Алварес

Хулијан Алварес е главната цел на Барселона кога е во прашање летниот преоден рок, а Каталонците испратија понуда од 100 милиони евра за аргентинскиот напаѓач пред неколку недели.

Сепак, Атлетико (М) јасно стави до знаење дека Алварес не е на продажба, особено не на голем ривал, и покрај тоа што самиот напаѓач јавно изјави дека сака да оди во каталонскиот клуб.

Ситуацијата помеѓу Барселона и Атлетико стана максимално напната, но Каталонците не ја повлекоа својата понуда. Тие чекаат Алварес да се врати во Мадрид со надеж дека ќе извршат дополнителен притисок врз него да го напушти клубот.

Алварес е сè уште на одмор по настапот на СП 2026, но работите не одат онака како што замислуваа челниците на Барселона.

Угледниот весник „Марка“ објави дека Алварес решил малку да „застане на топката“ и да ги смири страстите со челниците на Атлетико, а не да врши дополнителен притисок врз нив како што очекуваше Барса.

„Марка“ објави дека Алварес повторно воспоставил контакт со раководството на Атлетико и дека ситуацијата е многу подобра отколку што беше во претходниот период.

Тој наскоро ќе му се придружи на тимот за претсезонските подготовки и јасно е дека сака да ги смири работите најдобро што може пред да се врати во Мадрид за да избегне каква било потенцијална непријатност поради она што се случуваше.

Барселона се надеваше дека тој дури може да го бојкотира тренинг кампот и со тоа да изврши дополнителен притисок, но јасно е дека Алварес нема да го стори тоа.

Аргентинецот е свесен дека трансферот во моментов е целосно блокиран и дека веројатно ќе остане во Атлетико и јасно е дека веќе не сака да биде во „војна“ со никого во клубот.