Артета го купува најдобриот офанзивец во светот

Шведскиот интернационалец од редовите на Арсенал, Виктор Џокереш, ќе биде многу загрижен за време на летниот преоден рок, бидејќи големи се шансите да добие сериозна конкуренција во врвот на нападот.

Имено, менаџерот на „топџиите“, Микел Артета, одлучил дека сака да го доведе најдобриот офанзивен играч во светот во своите редови, напаѓачот на ПСЖ, Осман Дембеле.

Последниот освојувач на „Златната топка“ е еден од најдобрите офанзивни играчи во светот и може да игра како десно крило, но и како централен напаѓач.

Во ПСЖ, поранешниот играч на Барселона игра претежно како централен напаѓач во последните две сезони.

Кога е во прашање актуелната сезона, Дембеле постигна 11 гола на 24 натпревари и додаде седум асистенции.

Шпанските медиуми тврдат дека Артета и спортскиот директор на Арсенал, Андреа Берта, сериозно работат на овој трансфер и подготвуваат сè за летото.

Договорот на Дембеле со ПСЖ е до летото 2028 година и јасно е дека Арсенал ќе мора да потроши многу пари за да го доведе.

Доколку Арсенал успее во својата намера, тогаш сè би можело да има големо влијание врз Џокереш, кој би можел да биде преместен на клупата.

Сака е прв избор на десното крило и јасно е дека Дембеле би играл како централен напаѓач доколку дојде на „Емирати“.

Џокереш е моментално прв напаѓач на „топџиите“, откако минатото лето пристигна на „Емирати“ од Спортинг. Изминатата сезона постигна 13 гола и имаше две асистенции на 34 одиграни натпревари, а во актуелната на 24 натпревари постигна осум гола.