Геолозите открија дека африканскиот континент би можел да се подели порано отколку што претходно се проценуваше.
Активната тектонска зона во Источна Африка достигна „критичен праг“, а продолжувањето на овој процес би можело за неколку милиони години да доведе до создавање на целосно нов океан.
Иако „наскоро“ во овој случај значи неколку милиони години, тоа е релативно краток период во геолошката историја на Земјата.
Истражувањето покажува дека Земјината кора во областа на Источна Африка е значително потенка отколку што претходно се мислеше. Во центарот на расцепот Туркана, кој се протега низ Кенија и Етиопија, кората е дебела само околу 13 километри, додека на рабовите од оваа област надминува 35 километри.
Големиот источноафрикански расцеп е дел од процесот во кој Африканската тектонска плоча постепено се дели на два дела – Нубиска плоча на запад и Сомалиска плоча на исток.
Како што Земјината кора се истегнува и станува потенка, магмата од внатрешноста на планетата може да почне да формира нова океанска кора. Со текот на времето, во таа област би можел да настане нов океански басен кој би се исполнил со вода.
Сличен процес веќе се одвива во Афарската депресија, во североисточна Африка, во близина на Црвеното Море.
Ова откритие би можело да биде важно и за разбирањето на човечката еволуција. Областа Туркана во Кенија е едно од најбогатите наоѓалишта на фосили од раните хоминини.
Научниците сметаат дека тектонските промени можеби создале услови погодни за таложење на седименти, што помогнало во зачувувањето на фосилите.
Истражувачите проценуваат дека расцепот Туркана влегол во сегашната фаза на стеснување пред околу четири милиони години, што приближно се совпаѓа со времето на настанување на некои важни фосилни наоди.
Според научниците, геолошките процеси можеби имале значајна улога во создавањето на еден од најбогатите записи за еволуцијата на човекот. Истражувањето е објавено во списанието Nature Communications.
