8 март: Марш за рамноправност што трае повеќе од еден век!

Меѓународниот ден на жената денеска се одбележува низ целиот свет, одбележувајќи ја долгогодишната борба за економска, политичка и социјална еднаквост меѓу жените и мажите, која започна во средината на 19 век.

Меѓународниот ден на жената се одбележува низ целиот свет на 8 март, во спомен на демонстрациите на американските работнички во конфекциската и текстилната индустрија кои бараа подобри услови за работа во 1857 година, како и на познатиот женски марш на повеќе од 15.000 жени во Њујорк 51 година подоцна, во 1908 година, кои бараа пократко работно време, подобри плати и право на глас.

Денот на жената е воспоставен на Втората меѓународна конференција на жените социјалисти, на 8 март 1910 година во Копенхаген, по иницијатива на германката Клара Цеткин, водач на женското работничко движење во тоа време.

Првпат беше одбележан во 1911 година во Австрија, Германија, Швајцарија и Данска, кога повеќе од еден милион жени и мажи присуствуваа на собири барајќи жените да гласаат на избори, да им биде дозволено да извршуваат јавни функции и да имаат право на работа и стручно образование.

Демонстрации на жени работнички се одржуваа во речиси сите поголеми европски градови секоја година до 1915 година и почетокот на Првата светска војна.

Главното барање беше европските земји конечно да воведат универзално право на глас. Идејата на празникот е повик до сите да придонесат за елиминирање на дискриминацијата врз жените во теорија и пракса, но и апел до властите да се осигурат дека политиките што ги спроведуваат се во согласност со потребите на жените.

Обединетите нации официјално го прогласија 8 март за Меѓународен ден на жената во 1975 година.

Меѓународниот ден на жената стана повод за прославување на она што жените го постигнале во општеството, политиката и економијата. Се организираат собири и протести за да се истакне сè уште застапената нееднаквост.