Украинскиот претседател Володимир Зеленски се сретна во Ереван со британскиот премиер Кир Стармер, а главна тема на разговорот беше преговарачкиот процес за завршување на војната во Украина. Двајцата лидери разговараа и за одбранбената поддршка и напорите за ослабување на Русија, објави Зеленски на социјалната мрежа „Икс“.
Зеленски ја истакна важноста на британската поддршка и подготвеноста на Украина да продолжи со преговорите со цел постигнување праведен мир.
„Во Украина, ги цениме сите чекори што ги презеде Обединетото Кралство за да го поддржи нашиот народ и да го ослаби агресорот, вклучително и напорите за спротивставување на руската „флота во сенка“. Денес разговаравме за ова со Кира. Исто така, посветивме значително внимание на одбранбената поддршка на Украина, особено придонесите за иницијативата PURL. Украина е подготвена за следната рунда преговори во трилатерален формат. Процесот на преговори за постигнување праведен и достоинствен мир беше исто така меѓу темите на нашата дискусија. Ја цениме позицијата на Обединетото Кралство за континуиран притисок врз Русија. Тоа е навистина важно“, напиша Зеленски.
Покрај преговорите, тие разговарале и за поддршката на украинскиот енергетски сектор и ситуацијата на бојното поле. Зеленски ја нагласил потребата од зајакнување на европската безбедност.
„Го информирав премиерот за ситуацијата на бојното поле и руските напади врз Украина. Важно е Европа да ги координира своите напори и да развие заеднички систем за воздушна одбрана за да се заштити од заканите од Русија“, заклучи украинскиот претседател.
