Украинскиот претседател Володимир Зеленски упати итен апел до американскиот претседател Доналд Трамп и американскиот Конгрес, предупредувајќи дека Украина има критичен недостиг од воздушна одбрана и антибалистички ракети, додека руските напади се интензивираат.
Зеленски испрати итно писмо до Трамп, барајќи помош од него и американскиот Конгрес поради недостатокот на опрема потребна за воздушна одбрана во Украина.
„Кога станува збор за воздушна ракетна одбрана, се потпираме на нашите пријатели. Кога станува збор за балистичка ракетна одбрана, се потпираме речиси исклучиво на Соединетите Американски Држави“, се вели во писмото на Зеленски, кое го виде „Киев Индепендент“.
Пораката наводно ја одразува растечката загриженост на Киев поради тешкотиите во обезбедувањето оружје преку програмата „Приоритетна листа на барања за Украина“ (PURL), која им овозможува на сојузниците на НАТО да финансираат купување американско оружје за Украина.
„Сегашното темпо на испораки преку програмата PURL повеќе не е во чекор со реалноста на заканата со која се соочуваме. Ве молам за ваша помош во заштитата на украинското небо од руските ракети. Во име на украинскиот народ, со почит ги молам претседателот и Конгресот на САД да останат ангажирани и да ни помогнат да го обезбедиме ова витално средство за заштита од рускиот терор – ракетите Patriot PAC-3 и дополнителните системи – за да ги запреме руските балистички ракети и другите руски ракетни напади“, пишува Зеленски во писмото.
Тој додаде дека небото над Украина може да биде заштитено и дека повеќето руски ракети може да бидат запрени.
Порталот, исто така, објави дека украинската амбасадорка во Соединетите Држави, Олга Стефанишина, го проследила писмото до Белата куќа, претседателот на Претставничкиот дом, Мајк Џонсон, и други членови на Конгресот.
