Заложничка драма во Германија: Полицијата спаси две лица од банка, но не ги пронајде сторителите

Германската полиција попладнево влезе во зграда на банка во мал германски град и извади две лица од заклучен трезор, неколку часа откако полицајците беа повикани да реагираат на киднапирање.

Полицијата соопшти дека била известена за киднапирањето порано во текот на денот во филијала на Фолксбанк во Зинциг, град со 17.000 жители во долината на Рајна во близина на Кобленц.

Тие тогаш изјавија дека веруваат оти во банката има „неколку сторители и заложници“ и дека возачот на оклопно комбе за банкомат исто така бил киднапиран.

Полицијата подоцна попладне соопшти дека специјалните сили влегле во банката и ослободиле две неповредени лица од заклучениот трезор, но дека не ги пронашле киднаперите.

Тие рекоа дека „сторителот или сторителите изгледа дека заминале веднаш откако ги заклучиле двете лица во трезорот, но не е јасно како се случило тоа“.

Полицијата не соопшти дали сторителите зеле пари или вредни предмети.

Полицијата соопшти дека била известена за инцидентот околу 9 часот наутро и дека на местото на настанот биле испратени големи полициски сили, вклучувајќи и специјални сили, додека хеликоптери летале над нив, објави РТС.

Голем дел од центарот на градот бил блокиран, а полицијата ги повика жителите да ја избегнуваат областа.

Полицијата претходно не коментираше за извештаите што кружат на социјалните мрежи дека некои осомничени можеби се во бегство, велејќи дека од тактички причини, деталите за операцијата не се објавуваат во јавноста.