Вучиќ му одговори на Милановиќ: Не сум потрчко, нема да се изживуваш над мене

Српскиот претседател Александар Вучиќ изјави дека ја поддржува одлуката на хрватскиот претседател Зоран Милановиќ да го откаже самитот на Брдо-Брионскиот процес, нагласувајќи дека тој и онака нема место таму и дека е многу поважно за него да положи цвеќе во Јасеновац.

Вучиќ реагираше на најавата на Милановиќ дека го откажува собирот што требаше да се одржи во мај, бидејќи не сака Вучиќ да учествува на него поради неговите неодамнешни изјави, пренесува Танјуг.

„Во врска со моето присуство на Бриони, целосно го поддржувам Зоран Милановиќ. Тој е апсолутно во право, не припаѓам таму. Како претседател на Србија, отсекогаш сум сакал да одам и да положам цвеќе во Јасеновац, а тоа отсекогаш ми било неспоредливо поважно“, изјави Вучиќ за Танјуг.

Тој додаде дека може да оди на Бриони само како дел од неговите професионални обврски. „Да ја слушнам другата страна, да разговарам, бидејќи никогаш не сум избегал од дијалог“, објасни тој.

Вучиќ смета дека Милановиќ не требало да го откаже целиот собир, туку можел „убаво да ги покани своите другари од Приштина, Тирана и каде што сака“, бидејќи, како што вели, сигурно немал да ја расипе и наруши таа идилична атмосфера.

„Што се однесува до изјавите на кои се повикува Зоран Милановиќ, јас не сум негов потрчко и не сум Андреј Пленковиќ за да мисли дека може да ме злоупотребува како што злоупотребува некои од своите луѓе или претставници на други земји. Исто како што не сум потрчко ниту за Пленковиќ ниту за Гордан Грлиќ Радман да ми диктираат што ќе кажам. Зборувам како слободен и либертаријански претседател на Србија и ја кажувам вистината“, порача Вучиќ.

Претседателот Зоран Милановиќ испрати соопштение претходно вчера во кое наведува дека верува оти доаѓањето на претседателот Александар Вучиќ во Хрватска не е можно и затоа одлучил да го откаже состанокот од процесот Брдо-Бриони.

„Република Хрватска и Република Словенија, како членки на Европската Унија, го иницираа Процесот Брдо-Бриони со цел подобрување на меѓусебната соработка и забрзување на процесот на европска интеграција на земјите од Југоисточна Европа. Средбата на шефовите на држави од Процесот Брдо-Бриони беше закажана да се одржи во Хрватска во мај оваа година. Политичките изјави и постапки на претседателот на Република Србија, Александар Вучиќ, на кои бевме сведоци во последните денови и недели се во целосна спротивност со целта на Процесот Брдо-Бриони, ги нарушуваат меѓудржавните односи и го загрозуваат мирот и стабилноста во регионот на Југоисточна Европа,“ се вели во соопштението од кабинетот на Милановиќ.