Белата куќа за преговорите со Иран: Она што го кажуваат јавно е различно од она што го кажуваат приватно

Преговорите меѓу САД и Иран продолжуваат и одат добро, а јавните изјави на иранскиот режим се разликуваат од она што иранските претставници им го кажуваат на американските преговарачи приватно, изјави портпаролката на Белата куќа, Каролин Левит, нагласувајќи дека сè уште постои реална шанса за постигнување договор за нуклеарната програма.

– И покрај јавните изјави и неточните извештаи, преговорите продолжуваат и одат добро. Она што се кажува јавно е значително различно од она што ни се пренесува приватно – нагласи Левит, пренесе Ројтерс.

Портпаролката на Белата куќа додаде дека Иран повеќе нема можност сериозно да им се заканува на САД или на нивните сојузници, и дека преговарачите со кои разговараат изгледаат поумерени од претходните ирански лидери кои повеќе не се на власт.

– Сè уште постои реална шанса Иран да постигне добар договор и трајно да се откаже од својата нуклеарна програма – нагласи Левит.

Таа додаде дека американската администрација се обидува да обезбеди дека претставниците со кои преговара во Иран всушност имаат моќ да спроведат каков било договор, и дека сите приватни ветувања ќе бидат тестирани и потврдени.

Левит, исто така, наведе дека доколку Иран не го почитува договорот, американските сили се подготвени да ги користат сите воени опции, вклучително и прецизни напади и десантни операции што би го ослабнале иранскиот режим и би овозможиле контрола врз стратешките објекти, без окупирање градови.