Израелскиот претседател, Исак Херцог, му го довери мандатот за формирање нова влада на Гади Ајзенкот, главниот противник на премиерот Бенјамин Нетанјаху.
Одлуката доаѓа по изборите одржани минатиот месец, кои резултираа со политичка пат-позиција, бидејќи коалицијата на Нетанјаху не успеа да обезбеди мнозинство во Кнесетот, пренесуваат „Гардијан“ и „Индекс“.
„Исак Херцог го извести Гади Ајзенкот, лидер на партијата Јашар, за својата намера да му го довери мандатот за формирање влада“, соопштија од Кабинетот на претседателот. Официјалното именување ќе се одржи утре, за време на свеченост во претседателската резиденција во Ерусалим.
Политичката иднина на Бенјамин Нетанјаху е доведена во прашање откако неговата верско-националистичка коалиција го загуби парламентарното мнозинство на изборите одржани на 27 октомври. Сепак, неговиот блок останува најголемата групација во парламентот.
Патот на Ајзенкот до мнозинство
Ајзенкот, поранешен началник на Генералштабот на Израелските одбранбени сили, сега мора да обезбеди доволна поддршка за формирање влада. Неговиот блок, кој обединува партии што се противат на Нетанјаху, претходно одбиваше соработка со арапските партии. Сепак, лидерите на арапските партии го предложија Ајзенкот за време на консултациите со претседателот Херцог. Нивниот потег е мотивиран од незадоволството од политиките на Нетанјаху и неговите крајно десничарски сојузници, а нивната поддршка би можела да биде клучна за формирање ново владејачко мнозинство.
Без арапски партии, нема мнозинство
Според Основниот закон за влада на Израел, Ајзенкот ќе има 28 дена од добивањето на мандатот за формирање влада, а претседателот може да го продолжи тој рок за уште 14 дена.
Нетанјаху, премиерот со најдолг стаж во историјата на Израел, се бори да остане на власт откако неговата коалиција од десничарски и религиозни партии го загуби мнозинството на изборите на 27 октомври.
