Украински напад со беспилотно летало врз студентски дом во регионот Луганск: Бројот на жртви расте, 11 ученици се уште се водат за исчезнати

Бројот на жртви во украинскиот напад со беспилотно летало врз студентскиот дом во стручно училиште во регионот Луганск, кој е окупиран од Русија, се искачи на 10, соопштија властите.

Дополнителни тела се извлечени од урнатините на зграда во градот Старобилск, соопшти руското Министерство за вонредни ситуации. Вкупно 48 лица се повредени.

Локалните власти соопштија дека 11 ученици сè уште се водат како исчезнати и дека спасувачките екипи продолжуваат да ги пребаруваат урнатините.

Рускиот претседател Владимир Путин во петокот ја обвини украинската војска за „терористички напад“.

Путин започна инвазија на Украина во 2022 година, а потоа го анектираше регионот Луганск во источна Украина, кој Киев се обидува да го врати.

Украинскиот Генералштаб ја обвини Москва за ширење дезинформации, велејќи дека целта на нападот била руска воена единица специјализирана за напади со беспилотни летала против Украина која дејствува во Старобилск.

Путин инсистираше дека таму нема воени цели.

Генералниот секретар на ОН, Антонио Гутереш, го критикуваше нападот.

„Остро ги осудуваме сите напади врз цивили и цивилна инфраструктура, каде и да се случуваат“, изјави портпаролот на генералниот секретар на ОН во Њујорк.

Двете страни во војната редовно тврдат дека целат само на воени цели. Сепак, цивилите продолжуваат да бидат убиени и повредени, а цивилната инфраструктура се уништува од двете страни.

Сепак, цивилните загуби во руските напади во Украина се многу пати поголеми, пренесе „Хина“.