Туристите во Грција ова лето нема да бидат пречекани со „надуени“ цени во маркетите

Грчката влада постигна договор со големите трговски синџири и производителите на храна со кој во текот на летните месеци нема да има нови поскапувања на производите во супермаркетите. Мерката е дел од напорите за ограничување на инфлацијата во период кога земјата бележи најголема туристичка посетеност и зголемена потрошувачка.

Договорот беше постигнат на средба меѓу премиерот Киријакос Мицотакис, министерот за развој Такис Теодорикакос и претставници на прехранбената индустрија и трговските компании.

Според грчката влада, трговците се обврзале да ги задржат актуелните цени во текот на туристичката сезона и да не воведуваат нови поскапувања, со цел да се обезбеди ценовна стабилност и за граѓаните и за милионите туристи кои летово ќе престојуваат во земјата.

Договорот опфаќа околу 2.000 производи за широка потрошувачка, чии цени веќе беа намалени во претходниот период. Просечното намалување изнесува околу шест проценти, а компаниите се обврзале тие пониски цени да останат во сила најмалку во следните два месеца.

Од грчката влада најавуваат дека ова е првата мерка во пошироката стратегија за намалување на трошоците за живот. За септември е најавен нов пакет мерки, кој ќе биде дел од национален договор со бизнис-секторот за дополнително намалување на ценовните притисоци.

Со оваа иницијатива, властите се надеваат дека ќе го ублажат влијанието на инфлацијата, ќе ја зачуваат куповната моќ на граѓаните и ќе обезбедат стабилни цени во периодот кога потрошувачката традиционално е највисока поради летната туристичка сезона.