Трамп размислува да го забрани извозот на дизел

Американскиот претседател Доналд Трамп во средата изјави дека размислува за забрана на извозот на дизел, но предупреди дека таквата мерка би можела да доведе до раст на цените на бензинот.

Обраќајќи им се на новинарите во Белата куќа по соопштението за јужнокорејските инвестиции во енергетски проекти во САД, Трамп рече дека редовно разговара за оваа опција со министерот за енергетика Крис Рајт и министерот за внатрешни работи Даг Бургум.

„Размислувам за тоа“, рече Трамп на прашањето дали одлучил да го забрани извозот на дизел.

Тој истакна дека Рајт и Бургум сметаат оти забраната би можела да помогне во намалувањето на цените на дизелот, но би можела да ги зголеми трошоците за други производи, вклучително и за бензинот.

Трамп изрази очекување дека цените на нафтата ќе почнат да паѓаат, наведувајќи ги како причина големите количини нафта што минуваат низ Ормускиот теснец.

Тој проблемите со снабдувањето со дизел ги припиша првенствено на прекините во работата на руските рафинерии за дизел предизвикани од војната меѓу Русија и Украина, а не на настаните на Блискиот Исток.

Руските рафинерии за дизел се затвораат со алармантна брзина, рече Трамп, тврдејќи дека овој прекин е главниот фактор зад недостигот на дизел.

Рајт изјави дека администрацијата со недели и месеци работи секојдневно на решавање на овој проблем.

Тој истакна дека цените на дизелот паднале минатата недела и рече дека очекува дополнителни значителни намалувања во наредните денови и недели, како и најава за мерки за ублажување на притисокот врз снабдувањето. Рајт наведе дека губењето на руските испораки на дизел го заострило пазарот, додека прекините во извозот од Блискиот Исток и Кина дополнително го засилиле притисокот.

Американските рафинерии произведуваат на рекордно ниво, рече тој, додавајќи дека претстојните најави за дополнителни испораки на дизел од Европа би можеле да помогнат значително да се намалат цените.

Според податоците на Американската автомобилска асоцијација (AAA), просечната цена на дизелот во САД достигнала рекордни 6,53 долари (5,77 евра) за галон на 22 септември, пред да падне на 6,41 долар (5,66 евра) на 30 септември.