Трамп ја смени шефицата на кабинетот во Белата куќа: Еден од неговите најблиски советници, Стивен Милер, доаѓа на местото на „челичната дама“ Сузи Вајлс

Претседателот на САД, Доналд Трамп, вечерва објави дека еден од неговите најблиски советници, Стивен Милер, ќе ја замени Сузи Вајлс на функцијата шеф на кабинетот во Белата куќа. Оваа одлука доаѓа само неколку дена откако Републиканската партија ја изгуби контролата врз двата дома на американскиот Конгрес на изборите на средината од мандатот.

Во текот на двата претседателски мандати на Трамп, Милер беше клучен член на неговиот најтесен круг соработници. Тој е, исто така, главниот идеен творец на строгите имиграциски политики на администрацијата на Трамп.

На својата платформа за социјални медиуми, „Truth Social“, Трамп ја пофали Сузи Вајлс и изјави дека таа ќе продолжи да работи за неговата политичка организација.

Вајлс, исто така, денеска објави соопштение преку социјалните мрежи.

„Да му се служи на претседателот Трамп во Белата куќа беше чест на животот. Неверојатно сум горда на она што го постигнавме заедно – од обезбедување на границата (на САД) и намалување на даноците, до зајакнување на нашата економија и ставање на Америка на прво место“, изјави Вајлс кратко по објавата на Трамп. Таа додаде дека нејзината посветеност кон „претседателот и мисијата“ останува непроменета.

Вајлс важеше за исклучително вешт политички оперативец и долго време беше советник на Трамп.

Таа беше и првата жена во историјата која ја извршувала функцијата шеф на кабинетот во Белата куќа. Таа ја држеше оваа позиција најдолго време во текот на двата претседателски мандати на Трамп и беше позната по тоа што воведе дисциплина во хаотичниот стил на Трамп.

За време на неговиот прв претседателски мандат, Трамп смени четворица шефови на кабинетот.

Вајлс (69) во март објави дека боледува од рак на дојка; таа помина неколку месеци на лекување, по што изјави дека болеста е во ремисија – што значи дека во нејзиното тело повеќе нема траги од ракот.

Милер започна да работи за Трамп како автор на говори за време на претседателската кампања во 2016 година.

Во моментов тој ја извршува функцијата заменик-шеф на кабинетот во Белата куќа. Иако неговиот делокруг на работа е прилично широк, тој е најпознат по обликувањето на имиграциската политика на Трамп и по својата реторика во однос на имиграцијата. Милер претходно бил соработник на поранешниот сенатор Џеф Сешнс од Алабама, кој служел како прв јавен обвинител во првата администрација на Трамп (2017–2021), пренесе „Бета“.