Трагедија во Унгарија: Осум странски државјани загинаа во две одделни, а поврзани сообраќајни несреќи

Осум странски државјани загинаа во две одделни, но поврзани сообраќајни несреќи што се случија рано наутро во петокот на автопатот М1 во близина на унгарскиот град Ѓер.

Првата несреќа се случила околу 4:30 часот наутро на 114-тиот километар од автопатот М1, кој се движел кон Хеѓешалом и австриската граница. Според унгарската полиција, камион удрил во возило за одржување на патиштата, а потоа се запалил. Возачот на камионот починал на местото на настанот и покрај брзата интервенција на службите за итни случаи.

Полицијата веднаш започнала истрага и затворила дел од автопатот за да можат спасувачките екипи и форензичките експерти да спроведат истрага.

Само четириесет минути подоцна, околу 5:10 часот наутро, се случила уште посериозна несреќа. Минибус со девет патници удрил во камион кој бил запрен поради сообраќаен метеж предизвикан од претходна несреќа. Судирот се случил на 113-тиот километар од автопатот, само неколку стотини метри од местото на првата несреќа.

Седум патници од минибусот загинаа на местото на настанот, додека две лица беа повредени и однесени на лекување. Полицијата подоцна објави дека сите осум жртви во двете несреќи се странски државјани.

Властите сè уште не ги објавија националностите на жртвите.

По несреќите, автопатот М1 кон Австрија беше целосно затворен, а сообраќајот беше пренасочен по алтернативни правци. Полицијата и истражните органи ги истражуваат околностите на двете несреќи и ги повикуваат возачите да бидат дополнително внимателни.

Автопатот М1 е еден од најважните сообраќајни правци во Унгарија, кој ја поврзува Будимпешта со Австрија и секојдневно носи голем број патнички и товарни возила од неколку европски земји.

Премиерот Петер Маѓар изрази сочувство до семејствата на жртвите.

„Во име на владата, би сакал да изразам искрено сочувство до семејствата на осумте странски државјани кои ги загубија животите во сообраќајна несреќа на автопатот М1 во зори. Им посакуваме на повредените брзо закрепнување“, напиша Унгарецот на Фејсбук.

Истрагата за причините за трагедијата е во тек.