Студентите кои ги блокираат високообразовните институции низ цела Србија вечерва објавија дека, по повеќе од пет месеци мирна борба за исполнување на нивните барања, преминуваат во нова фаза на политичко дејствување – бараат распуштање на Народното собрание и распишување предвремени парламентарни избори, повикувајќи се на член 109 од српскиот Устав.
Во објава на социјалните мрежи, студентите истакнаа дека од декември минатата година се обидуваат да ги остварат своите цели со сите легитимни и ненасилни средства, но дека владата сè уште не покажува никаква иницијатива да одговори на нивните барања.
„Студентското движење иницираше протести од невидени размери, покажувајќи дека гласот на младите не е само бучава, туку сила што може да иницира промени, да го врати достоинството и да ја разбуди надежта за правда и слобода“, изјавија студентите, додавајќи дека движењето „докажа дека суверенитетот на нашата земја е во рацете на народот“.
Во соопштението, тие исто така оценуваат дека, како што наведуваат, „корените на корупцијата во владата навлегле премногу длабоко во државните институции“, што, според нив, го оневозможило самостојното извршување на должностите.
„Сведоци сме на една од пресвртните точки во модерната историја на нашата земја“, наведуваат студентите, нагласувајќи дека како општествена група „со најголема национална доверба“ преземаат решителен чекор – барање за итно распуштање на Собранието.
Студентите, исто така, ја објавија својата поддршка за идниот изборен список, за кој велат дека ќе ја пренесе довербата на сите студенти во блокадата со цел надминување на политичката и социјалната криза.
„Веруваме дека демократијата е единствениот правилен начин за решавање на криза од ваков обем. Вистината мора да победи на вагата на правдата“, рекоа студентите во нивната завршна порака.
