Студент обезглавил вработена на Варшавскиот универзитет

Студент по право на Универзитетот во Варшава синоќа уби рецепционерка со секира додека се обидувала да го затвори влезот во зградата кога 22-годишниот напаѓач влегол во кампусот, а обезбедувањето кое се обидело да ја заштити било тешко повредено и итно префрлено во болница, соопшти полската полиција.

„Сторителот е 22-годишен полски државјанин. Неговите мотиви се непознати. Знаеме дека нападнал со остро оружје. Многу брутално. Веќе е уапсен. Убиена е техничка работничка од Универзитетот во Варшава. Друго лице е тешко повредено и однесено во болница. Ќе дадеме подетални информации 40 часа по увидот“, изјави за „Газета Виборча“ Пјотр Скиба, портпарол на Окружното обвинителство во Варшава.

Ректорот на Универзитетот во Варшава прогласи ден на жалост утре, 8 мај, и свика кризен штаб. Според првичните извештаи, убиецот ја избрал жртвата по случаен избор.

По нападот, во кој тој нападнал рецепционерка пред бројни студенти и жестоко ја удирал со секира, обезглавувајќи ја, напаѓачот не избегал, туку чекал да биде уапсен од универзитетското обезбедување, објавија полските медиуми.

„Шокиран сум од бруталниот злостор на Универзитетот во Варшава. Се надевам дека повредениот човек во нападот ќе се опорави. Мора да се изрече строга казна за овој брутален напад“, порача градоначалникот на Варшава, Рафал Часковски, на мрежата X.

Во времето на нападот, министерот за правда Адам Боднар бил на Универзитетот на предавање и веднаш бил евакуиран, но според извори од полското Министерство за правда, нападот нема никаква врска со политиката или министерот.

Засега, на почетокот на истрагата, полицијата нема информации за причините, а според медиумите, на злосторството биле сведоци многу студенти.