Смртта на спортист во психијатриска болница ја потресе Хрватска: Вознемирувачки детали од безбедносните камери

Хрватска, како и целиот регион, е потресена од трагичната смрт на поранешниот спортист Кристијан Јосип Периш, кој почина во Психијатриската болница „Свети Иван“. Снимките од безбедносните камери во загрепската болница открија шокантни детали за последните моменти од животот на поранешниот спортист.

Хрватскиот весник „Јутарњи лист“ објави дека дошол до снимки од болничкиот видео-надзор, иако самото видео не го објави, поради многу вознемирувачка содржина, од безбедносните камери во собата 11а во Психијатриската болница „Свети Иван“. Повеќе од осум минути, главата на Кристијан Јосип Периш била притискана надолу со перница, врз која вршеле притисок со стапалата – прво еден, а потоа двајца медицински техничари. Во еден момент, во собата имало дури десет лица.

Од почит кон семејството на починатиот – кое не сакаше да го коментира случајот – порталот не ја објави целосната снимка, туку ги издвои најдраматичните сцени. Според описот на весникот, за време на интервенцијата Периш бил врзан за кревет, а медицинските техничари продолжиле да вршат притисок врз него дури и откако тој престанал да дава отпор. Според полицискиот извештај, техничарите вршеле притисок врз лицето и вратот на Периш и го удирале. Овие детали потекнуваат од полицискиот опис на снимките, додека истрагата за околностите на неговата смрт сè уште трае.

Во саботата, загрепската полиција поднесе кривична пријава против четворица осомничени и ги уапси сите нив. При првичното испрашување, тројца од осомничените го искористија своето право да се бранат со молчење, додека само Младен Л. даде исказ во своја одбрана. На сите четворица им е одреден притвор во траење од еден месец поради опасност од повторување на делото, можност за влијание врз сведоците, како и поради особено тешките околности на случајот.

За време на разговорот со лекарот што ги повикал, полициските службеници дознале дека Периш не сакал да влезе во болницата. Лекарот исто така им кажал дека Периш не бил агресивен и дека соработувал со медицинскиот персонал, како и со полицијата.

„Не сакам да влезам внатре, минатиот пат ме задушивте и ме врзавте за креветот. Не сакам лекарите да ме допираат – сакам да разговарам само со полицијата.“

Тој седеше на клупа, не давајќи никаков отпор и не покажувајќи никаква агресија. Кристијан Јосип Периш ги изговори овие зборови тој ден – среда, 21 октомври – околу 16:30 часот. Сепак, истата вечер, неговата сестра доби известување од болницата дека Кристијан починал.

Членовите на семејството пристигнаа во болницата, но персоналот првично одби да им дозволи да го видат неговото тело. Еден лекар објасни дека Кристијан примал терапија, станал агресивен и бил врзан – по што престанал да дише. Дежурниот лекар на крајот им го покажа телото на Кристијан, а членовите на семејството забележаа модрици околу неговиот врат, мали рани под усната и траги од крв кои претходно ги немало. Лекарот тврдел дека овие траги се последица од интубација.

Хрватското Министерство за здравство побара итно утврдување на одговорноста во врска со смртта на еден млад човек во Психијатриската болница „Свети Иван“ во Загреб и изрази сочувство до семејството. Од Министерството наведоа дека дури денес биле известени за овој трагичен настан. Тие побараа итен извештај од Градот Загреб – како основач на болницата – во кој ќе бидат детално наведени сите околности на случајот, како и објаснување зошто Министерството не било известено порано.

„Сцените на брутален третман врз врзан и беспомошен пациент претставуваат неприфатливо кршење на основните начела на хуманост, достоинство, медицинска етика и професионализам“, се вели во соопштението.

„Подеднакво загрижувачки е фактот што Министерството за здравство дури денес доби известување за овој несакан настан, иако тој резултирал со смртен исход. Сакаме да укажеме дека *Правилникот за стандардите за квалитет во здравствената заштита и начинот на нивно спроведување* (Службен весник бр. 79/11) – конкретно точката 2.3 која се однесува на стандардите за безбедност на пациентите и вработените – наложува директорот на болницата, односно одговорното лице, веднаш да го извести Министерството за секој неочекуван несакан настан“, наведуваат од Министерството, поставувајќи прашање кој сè знаел за инцидентот и зошто Министерството не било навремено известено.

Министерството бара итен и сеопфатен извештај од Градот Загреб – како основач на болницата – кој ќе ги опфати сите околности на настанот, постапките на управата, навременоста на пријавувањето, како и надзорот врз работењето на установата. „Одговорноста не смее да запре само кај оние што биле директно вклучени во инцидентот. Мора да се испита одговорноста на директорот, болничката управа и сите други одговорни лица, како и одговорноста на основачот, во рамките на неговите законски овластувања и обврски. Основачот не може да биде ослободен од одговорноста што произлегува од неговата улога во надзорот врз работењето на установата“, се наведува во соопштението.

Тие апелираат до „Градот Загреб веднаш да ја преземе одговорноста што произлегува од неговата улога како основач, да спроведе итна и темелна истрага за постапките на болничката управа и да ги преземе сите мерки што се во негова надлежност“. „Очекуваме конкретни одговори. Недозволиво е, по еден ваков трагичен настан, одговорноста само да се префрла од една на друга страна, или пак од јавноста да се очекува да се задоволи со површни објаснувања.“

Од Министерството наведуваат дека ќе инсистираат на целосно расчистување на случајот, утврдување на индивидуална и раководна одговорност, како и на спроведување на сите мерки предвидени со закон.

„Достоинството, безбедноста и животот на секој пациент мора да бидат апсолутен приоритет на здравствениот систем“, се заклучува во соопштението.