Шумски пожари беснеат низ цела Европа, најкритичнo во Грција

Грција останува во состојба на висока готовност за пожари, бидејќи големи пожари продолжуваат да горат низ целата земја, а пожарите се разгоруваат и во Франција.

Критична ситуација во Грција
Големи делови од Грција се оценети како со највисок ризик од пожари, а службите за цивилна заштита прогласија највисоко ниво на црвена готовност за поширокиот регион на Атина. Ситуацијата беше најкритична околу 60 километри северозападно од главниот град, каде што пламените јазици напредуваа по фронт широк неколку километри. Стотици луѓе беа превезувани на безбедно место со брод, според извештаите на медиумите.

Шумски пожари беснееја и на полуостровот Пелопонез. Портпаролот на противпожарната служба изјави дека екипите се бореле со 73 пожари во петокот навечер. Уште еден голем пожар избувна западно од Атина, што доведе до превентивна евакуација на предградието Дасос, бидејќи густ чад и пламен се закануваа на густо населената област.

Големи пожари продолжија да горат и на Крит. Иако ситуацијата на островот се подобри, силните ветрови се закануваат да ги разгорат повторно пламените јазици и сериозно да ги попречат воздушните операции за гаснење пожари.

Илјадници евакуирани во Франција
Во департманот Вар во јужна Франција помеѓу Марсеј и Кан, пожар повторно се разгоре и брзо се прошири во петокот, принудувајќи евакуација на околу 2.500 луѓе.

Околу 1.000 хектари изгореа за само неколку часа, според властите. Властите во петокот вечерта соопштија дека се распоредени 720 пожарникари.

Франција и соседна Шпанија се борат да ја локализираат серијата сериозни шумски пожари предизвикани од високите температури и сува вегетација, а научниците посочуваат на климатските промени како причина за поинтензивни и почести пожари.

На другата страна од Европа, Турција исто така се бори со големи пожари.