Што велат научниците за рекордниот топлотен бран во Европа: Највисоките ноќни температури оваа недела се 100 пати поверојатни отколку пред само две децении

Рекордниот топлотен бран што ја погоди Западна Европа би бил „практично невозможен“ без климатските промени предизвикани од човекот, што ги направи исклучително високите ноќни температури оваа недела 100 пати поверојатни отколку пред само две децении, изјавија денеска научниците.

„Во регионот што се разгледува, овој топлотен бран е најсилниот досега“, соопшти климатската група World Weather Attribution (WWA) во својата анализа, објави Ројтерс.

Велика Британија во четврток постави рекордно високо ниво за јуни, во услови на смртоносен топлотен бран што одзеде десетици животи, прекина снабдувањето со електрична енергија и затвори училишта и културни знаменитости

Анализата на WWA покажа дека глобалното затоплување ги влоши европските топлотни бранови во последните децении. Сличен топлотен бран во јуни 1976 година би бил околу 3,5°C поладен од сегашниот, рекоа истражувачите.

Од повеќе од 800 анализирани европски градови, 45 проценти доживеале или се очекува да доживеат највисоки нивоа на топлотен стрес до крајот на јуни. Топлинскиот стрес се јавува кога телото повеќе не може да се лади преку потење.

Научниците со години знаат дека човековото влијание врз климата ги прави топлотните бранови и поверојатни и поинтензивни. Емисиите на стакленички гасови, главно од согорување на јаглен, нафта и гас, ја зголемија просечната температура на планетата на околу 1,4°C над прединдустриските нивоа во 19 век, според Светската метеоролошка организација.

„Во моментов не правиме доволно за да го забавиме темпото на глобалното затоплување. Како што продолжува, треба да очекуваме рекордните температури да бидат срушени почесто“, рече Клер Барнс, истражувач за екстремни временски услови на Империјал колеџ во Лондон и коавтор на анализата на WWA.

Европа е континентот што се затоплува најбрзо во светот

Анализата на WWA наведува дека здравствените последици од овој топлотен бран само што почнуваат да се појавуваат и укажува на научна студија што покажа дека повеќе од 60.000 луѓе починале од причини поврзани со топлината за време на серија топлотни бранови во летото 2022 година.

Здравствените ризици за време на топлотните бранови се дополнително влошени од високите ноќни температури, кои го спречуваат телото да се опорави од дневниот стрес.

Во делови од Франција, ноќните температури останаа над 20°C повеќе од една недела – познато како „тропска ноќ“ – а некои ноќи имаа минимални температури близу 30°C.

Феноменот Ел Нињо, кој се јавува во тропскиот Пацифик и обично ги зголемува глобалните температури, не придонесе за овој европски топлотен бран, според анализата на WWA.