Шпионирање, прислушување и лажен атентат ја тресат Унгарија

Петар Маѓар, кандидатот на опозицијата за унгарски премиер, денес изјави дека доколку неговата партија Тиса победи на изборите на 12 април, веднаш ќе истражи информации дали Петер Сијарто, министер за надворешни работи во владата на премиерот Виктор Орбан, во дослух со Русите, ги предал унгарските и европските интереси, што според Унгарците е велепредавство казниво со доживотен затвор. Американскиот весник „Вашингтон пост“, во своето понеделничко издание, објави обемна статија во која, меѓу другото, откри дека Сијарто редовно му се јавувал на рускиот министер Сергеј Лавров, за време на паузите на состаноците на Европскиот совет и Советот на ЕУ во Брисел и му ги пренесувал деталите од дискусиите зад затворени врати. Во истата статија, како уште поважно откритие, се наведува дека руската тајна служба СВБ предложила организирање на исцениран обид за атентат врз премиерот Орбан со цел нагло да ги зголеми неговите шанси за победа на изборите, пред кои анкетите покажуваат дека опозицијата води веќе неколку недели. И Кремљ и претставниците на владата на Орбан ги негираат тезите во статијата, но некои учесници на самитите во Брисел потврдија дека тие самите одамна биле свесни за унгарската практика на протекување доверливи информации од Брисел до Москва.

„Долго време се сомневаме во ова. Ова е една од причините зошто зборувам само кога е строго неопходно и ги кажувам само најнеопходните работи“, напиша полскиот премиер Доналд Туск. Владата на Орбан и партијата Фидес одговорија на целиот скандал со тактиката „нападот е најдобра одбрана“ и објавија аудио-снимка на која, тврдат тие, се гледа како независниот унгарски новинар, Саболч Пањи, го споделува бројот на Сијарто со членови на неименувана странска разузнавачка служба. Именуваниот новинар на Фејсбук појасни дека некој очигледно снимил разговор со еден од неговите извори без овластување, со кого разговарал како новинар бидејќи долго време работел на приказната за контактите на Сијарто со Лавров. Пањи тврди дека не го дал бројот на Сијарто на европска тајна служба, но дека таа служба претходно ја следела комуникацијата на Сијарто со Лавров, а Пањи работел како новинар за да ја потврди таа приказна.

„Прислушувањето на член на владата е сериозен напад врз Унгарија. Му наложив на министерот за правда веднаш да ги истражи информациите поврзани со прислушувањето на Петер Сијарто“, напиша премиерот Орбан на Фејсбук. Статија во „Вашингтон пост“, објавена денес во весниците, а онлајн во саботата, опишува како „Русите ќе сторат сè за да го одржат Орбан на власт“ затоа што „ја сметаат Унгарија за дел од нивната сфера на влијание“. Американскиот весник пишува дека имал пристап до внатрешен документ на руската тајна служба СВБ, кој бил добиен и автентициран од неименувана европска тајна служба. Во овој документ, пониските оперативни нивоа на СВБ им сугерираат на повисоките нивоа во службата да се изврши лажен обид за атентат врз унгарскиот премиер Орбан, бидејќи тоа би ја променило целата парадигма на изборната кампања во негова корист.

„Таквиот инцидент би ја променил перцепцијата за кампањата надвор од рационалната сфера на социоекономските прашања во сферата на емоциите, во кои националната безбедност и стабилноста и одбраната на политичкиот систем стануваат клучни теми“, цитира „Вашингтон пост“ текст од наводен интерен документ на руската служба за надворешно разузнавање СВБ. Покрај руската влада, премиерот Орбан е поддржан и од сегашната американска влада, односно претседателот Доналд Трамп, кој сними видео порака во која го поддржува Орбан.