Сè уште активен пожарот во НП „Јасен“

На  територијата на државата, во текот на деешниот ден биле регистрирани вкупно шест пожари на отворен простор. Од нив, активни се два, и тоа пожарот во Националниот парк „Јасен“, каде што гори мешана шума на територијата на Општина Македонски Брод, како и во селото Крапа, каде што горат ниска вегетација и нискостеблеста шума.

Поради пожарот во „Јасен“, утринава целосно беше затворен за сообраќај патниот правец од Брезница, преку Националниот парк „Јасен“, до Македонски Брод.

Директорот на Дирекцијата за заштита и спасување, Стојанче Ангелов, нагласи дека пожарот во НП „Јасен“ е тежок за гаснење поради тешко пристапниот терен. Тој нагласи дека во неговото гаснење учествуваат два полициски хеликоптера и еден армиски, додека од земја им се приклучиле 15-мина припадници на специјалната единица на МВР, како и 26-мина припадници на специјалната единица на АРМ.

– Освен тоа, во гаснењето на пожарот учествуваат и  вработени во НП „Јасен“, како и од ЈП „Национални шуми“ – информираше Ангелов.

Под контрола се ставени два пожара и тоа во атарот на селото Нерав, во местото викано Биљино, на територијата на Општина Крива  Паланка, како и во населбата  Дива Населба, во близина на салонот „Дули“ во Куманово.

Ангелов истакна дека се работи и на догасување на пожарот  во скопското село Свиларе, каде што се вклучени два „пинц гауери“ на ДЗС, како и припадници на Бригадата за противпожарна заштита на Град Скопје. 

Изгаснати се два пожара, и тоа во селото Чешниво во Општина Чешиново – Облешево и во селата Челопеци и Миокази во Општина Кичево.