Сателитите регистрираат повлекување на американските носачи на авиони „Линколн“ и „Форд“ од потенцијалните зони на удар

Според најновите податоци од воените и безбедносните аналитичари, САД значително ги преместија своите најмоќни поморски платформи на Блискиот Исток, обидувајќи се да ги намалат оперативните ризици во услови на сè понапната безбедносна ситуација во регионот.

Според порталот „Дефенс секјурити Азија“, американските носачи на авиони „Абрахам Линколн“ и „Џералд Р. Форд“ се повлечени на поголемо растојание од потенцијалните зони на напад, првенствено од правецот на Иран и јеменските Хути. Овој потег се толкува како превентивна мерка насочена кон намалување на изложеноста на американските ударни групи на закани од ракети и беспилотни летала што доаѓаат од копно.

Анализата на сателитските снимки објавени на платформата „МизарВизион“ покажува дека носачот на авиони „Абрахам Линколн“ значително ја променил својата позиција.

Бродот, кој претходно бил на помалку од 350 километри од иранскиот брег, сега се преселил повеќе од 1.100 километри од иранската територија, во југозападните омански води, во близина на градот Салалах.